बिष्णुप्रसाद पोखरेल
दमक, असोज १७ गते । झापाको दमक नगरपालिकाले अति विपन्न तीन सय घरपरिवारलाई दैनिक उपभोग्य खाद्य सामग्री उपलब्ध गराएको छ । विपन्न पहिचान कार्यविधि अनुसार वडाले सिफारिस गरेका आधारमा चामल, नुन, तेल, दाल लगायतका खाद्य सामग्रीहरू उपलब्ध गराइएको नगर प्रमुख रामकुमार थापाले बताउनुभयो ।
नगरपालिकाका अनुसार जनही पाँच हजार २ सय ५० मूल्य बराबरको खाद्य सामग्रीहरू उपलब्ध गराएको हो । उहाँका अनुसार वितरण गरिएको राहत सामग्रीहरूमा ५० केजी मन्सुली चामल, २ केजी मुसुरो दाल, २ लिटर खानेतेल, २ केजी नुन, ५ थान साबुन रहेको छ ।
साबुन ५ पिस उपलब्ध गराइएको हो । खाद्यान्न घरघरसम्म ढुवानीका लागि लक्षित परिवारलाई रु २ सय रुपियाँ समेत प्रदान गरिएको थियो । चाडपर्वको मुखमा यसरी दैनिक अति आवश्यकीय खाद्यान्न पाएपछि अति विपन्न परिवार खुसी बनेका छन् ।
खाद्य सामग्री घरसम्म पुर्याउन र लिन आउनका लागि २ सय रुपियाँ यातायात खर्च पनि उपलब्ध गराइएको नगर उपप्रमुख रेगिना भट्टराईले जनाउनुभयो। नगरपालिकाको चालु आर्थिक वर्षको नीति तथा कार्यक्रममा ‘जहाँ विपन्न त्यहाँ खाद्यान्न’ भन्ने कार्यक्रम ल्याइएको छ ।
