हरि कोइराला
उर्लाबारी, भदौ २९ गते । मोरङको पथरी–११ फुटबल क्लब यतिबेला तेस्रो पटक सरेको मितिमा पथरीशनिश्चरे गोल्डकपको आयोजना गर्न जुटेको छ ।
स्रोत सुनिश्चित नभएपछि यसअघि दुईपटक मिति सरेको गोल्डकप आगामी असोज ५ गते देखि आयोजना गर्ने तयारी भइरहेको छ । यतिबेला पथरीशनिश्चरे–१ को जाँतेमोडस्थित प्रस्तावित रङ्गशालामा धमाधम अस्थायी प्याराफिट भइरहेको छ ।
दैनिक तीन हजार दर्शकले फुटबल हेर्न सक्ने क्षमताको बाँसको प्याराफिट निर्माण भइरहेको खेल संयोजक जितन राईले बताउनुभयो । उहाँले भन्नुभयो,‘‘प्याराफिट बनाउन ठेक्का दिइसक्यौँ । आधाभन्दा बढी काम सम्पन्न भइसकेको छ । त्यसकारण अब गोल्डकप जसरी पनि आयोजना हुन्छ । झण्डै चालिस लाख रुपियाँ खर्च हुने अनुमान गरिएको प्रतियोगिताका लागि पथरीशनिश्चरेबाट वैदेशिक रोजगारमा विभिन्न देश पुगेका फुटबल प्रेमीहरूले सहयोग गरिरहनुभएको छ । ’’
‘‘तीनै तहका सरकारलाई सहयोगको लागि आह्वान गर्यौँ । सहयोग प्राप्त हुने सुनिश्चित नभएपछि जसरी पनि प्रतियोगिता सफल पार्नु पर्छ भनेर हामी लागेका छौँ । ,क्लबका अध्यक्ष सुमन विकले भन्नुभयो । कुनै पनि खेल आयोजना गर्दा को खुसी हुन्छ, वा हुँदैन त्यो विषयसँग सरोकार नराखी हामी अघि बढेका छौँ । सहयोग जुट्ने क्रम जारी छ । क्लबको लोगो अङ्कित टिसर्ट पनि सहयोगीहरूका लागि प्रदान गरिरहेका छौँ ।’’
हात थापेर फुटबल आयोजना गराउनु पर्ने बाध्यता रहेको खेल संयोजक जितन राईको भनाई छ । राईले प्रथम पुरस्कार तीन लाख रुपियाँ सिजल एण्ड सिस्टर अमेरिकाले सौजन्य गरेको र दोस्रो पुरस्कार दुई लाख रुपियाँ पनि सौजन्यको चरणमा रहेको बताउनुभयो ।
त्यस्तै उत्कृष्ट गोल रक्षकका लागि १० हजारको पुरस्कारको सौजन्य पनि प्राप्त भएको छ । राईले अब गहना धितो राखेर पनि प्रतियोगिता आयोजना गर्ने प्रतिबद्धता जनाउनुभयो ।
प्रतियोगितामा ‘ए’ डिभिजन राष्ट्रिय लिग खेल्ने दुई वटा टिम, भारतीय एउटा र झापा–११, पाँचथर, सहलेस फुटबल क्लब सिराहा, धनकुटा, धरान र आयोजक क्लबले प्रतिस्पर्धा गर्ने भएका छन् ।
आन्तरिक खर्च शून्य बनाएर दाताले दिएको सहयोग सबै खेलमा लगानी गर्ने आयोजकहरूको भनाई छ । राईले भन्नुभयो, ‘‘अहिले सम्म एक कप चियासम्म क्लबको पैसाले पिएका छैनौँ । खेलप्रति माया गर्नेहरूले देखाउनु भएको सद्भाव टुट्न दिँदैनौँ ।’’
