मुगु समाचारदाता
मुगु, भदौ २५ गते । लामो समयदेखि रारा विमानस्थलको ट्रस टर्मिनल भवन निर्माण हुन नसक्दा अलपत्र अवस्थामा छ । पाँच वर्षदेखि उक्त टर्मिनल नबन्दा उडान प्रभावित हुँदै आएका छन् । २०७८ सालमा मै निर्माण सम्पन्न हुनुपर्ने प्राधिकरण र निर्माण कम्पनीबिच सम्झौतामा उल्लेख छ । उक्त भवनको निर्माण ठेकेदार कम्पनी ओमबुद्ध इन्टरनेसनल कन्स्ट्रक्सनको लापर्बाहीका कारण पर्यटक र कर्णालीवासीले समस्या खेप्नुपरेको छ ।
टर्मिनल भवन निर्माणका लागि सम्झौताको समय सकिए पनि सम्बन्धित निकायले चासो नदिँदा समस्या भएको स्थानीयको आरोप छ । ओमबुद्धले आधुनिक ट्रस टर्मिनल भवन निर्माण गर्नलाई २०७६ असोज १६ मा ३० महिनाभित्र सम्पन्न हुने गरी प्राधिकरण र निर्माण कम्पनीबिच सम्झौता भएको रारा नागरिक उड्डयन कार्यालय ताल्चाले जानकारी गराएको छ ।
उक्त भवनको काम आठ करोड ६५ लाख नौ हजार ९९४ रुपियाँ लागतमा सम्पन्न गर्ने गरी निर्माण कम्पनीले जिम्मा लिएको थियो । प्राधिकरणका एरोडम इन्जिनियरिङ विभागका इन्जिनियर महेश नेपालीका अनुसार निर्माण कम्पनीलाई काम सम्पन्न गर्नलाई ताकिता गरिएको बताउनुभयो । हालसम्म आयोजनाको ९० प्रतिशत काम सम्पन्न भएको छ । चालु आवको असोज मसान्तसम्म सम्पन्न हुने गरी म्याद थप गरिएको छ ।
रारा नागरिक उड्डयन कार्यालय ताल्चाका कार्यालय प्रमुख सन्तोष गौतमका अनुसार निर्माण कम्पनीले समयमै काम नसक्दा पुरानो काठकै भवन र टहरामा जोखिम मोलेर काम गर्नु परेको बताउनुहुन्छ । उहाँले भन्नुभयो, “निर्माण कम्पनीले समयमै काम सम्पन्न नगरिदिँदा सामान्य हावा लाग्दासमेत हल्लिने काठको भवन र टहरामै जोखिम मोलेर काम गरिरहेका छौँ ।”
रारा विमानस्थलमा समयमै टर्मिनल भवन सम्पन्न नहुँदा आउजाउ गर्ने यात्रुलाई घामपानी र हावाहुरी लागेका बखत ओत लाग्नेसम्म ठाउँ पनि छैन । ओमबुद्ध इन्टरनेसनल कन्स्ट्रक्सनका सञ्चालक भोजराज खड्का भौगोलिक विकटताका कारण समयमा सामान ढुवानी नहुनु र कोरोनाका कारण निर्माणमा अवरोध उत्पन्न हुँदा काम ढिला भएको बताउनुहुन्छ । चालु आवको असोज मसान्तसम्मका लागि म्याद थपिएको तर उक्त अवधिमा पनि काम सकिने सम्भावना नरहेको खड्काले बताउनुभयो । स्थानीय दीपेन्द्र भाम समयमै काम सम्पन्न नगर्ने निर्माण कम्पनीलाई ताकिता नगर्नु सम्बन्धित निकायको कमजोरी भएको बताउनुहुन्छ ।
