काठमाडौँ, भदौ २४ गते । उपप्रधान एवम् सहरी विकासमन्त्री प्रकाशमान सिंहले देशलाई समृद्ध र नागरिकलाई खुसी बनाउने गरी सरकारले काम गरिरहेको बताउनुभएको छ ।
सोमबार मन्त्रालयमा नेकपा (एमाले)को सहरी विकास हेर्ने विभागको तर्फबाट नेता शेरबहादुर तामाङ नेतृत्वले बुझाएको ज्ञापनपत्र ग्रहण गर्नुहुँदै उहाँले यस्तो बताउनुभएको हो ।
मन्त्री सिंहले जनतालाई सन्तोष पार्न सरकारले आवश्यक पहलकदमी लिइरहेको जिकिर गर्नुभयो । ऐनहरूको अभावका कारण सहरी विकासलाई व्यवस्थित गर्न नसकिएको भन्नुहुँदै अहिले सरकारले पुराना ऐनहरूको संशोधन गरी नयाँ ऐन बनाउने कामलाई पहिलो प्राथमिकतामा राखेर काम गरिरहेको उहाँको भनाइ छ ।
आफू मन्त्री बनेर आइसकेपछि सबैभन्दा बढी जोड विकास निर्माणका कामहरू र नीति बनाउने कामलाई दिएको उहाँले स्पष्ट पर्नुभयो । उहाँले नीति निर्माण र कार्यान्वयनमा सबैले सहयोग गर्ने अपेक्षा राख्नुभएको छ ।
उपप्रधानमन्त्री सिंहले गाउँपालिका वा नगरपालिकाभित्र बस्ने मानिसहरूको जीवन सहज हुनुपर्ने र त्यसका लागि सहरहरू विकास गर्दा सुविधायुक्त गाउँ र सहर बनाउनुपर्ने बताउनुभयो ।
उहाँले अत्यावश्यक भौतिक पूर्वाधारहरू गाउँगाउँमै पुर्याउनुपर्नेमा सरकार लागिरहेको बताउनुभयो । नेकपा (एमाले)को सहरी विकास विभागले सहर व्यवस्थित बनाउने सुझावसहितको ज्ञापनपत्र उपप्रधानमन्त्री सिंहलाई बुझाएका हुन् ।
