योजनाबिना विद्यालयलाई १० लाख भुक्तानी

प्रेमराज सिम्खडा

कालीकोट, भदौ ६ गते । कालीकोटको रास्कोट नगरपालिकाले एक विद्यालयलाई बिना योजना दश लाख रुपियाँ भुक्तानी दिएको छ । गत असार मसान्तमा रास्कोट नगरपालिका वडा–६ मा रहेको अन्नपूर्ण आधारभूत विद्यालय बडरुख सुन्मुलालाई १० लाख रुपियाँ दिएको पाइएको हो । 

बिनायोजना शिक्षा शाखा र नगर प्रमुखको मिलेमतोमा सो रुपियाँ दिएको पाइएको छ । हाल नगरको आर्थिक लेखा परीक्षणको क्रममा सो विद्यालयलाई सो भुक्तानी गरेको देखिएको हो ।  नगरका शिक्षा शाखा प्रमुख खेमराज शाहीले एक जना शिक्षकको तलब भुक्तानी गर्दा एक्सलमा मिस्टेक भएर एक सुन्ना थपिदा एक लाख भुक्तानीको सट्टा दश लाख भुक्तानी भएको जिकिर गर्नुभयो । 

असुलउपर गर्नुपर्ने भए पनि विद्यालयले अहिलेसम्म फिर्ता नगरेकाले अब आगामी तीन–तीन महिनामा सो विद्यालयलाई दिनुपर्ने अनुदानबाट कटौती गरेर असुल गर्दैजाने जबाफ दिनुभयो । शिक्षा शाखा प्रमुख शाहीको यस्तो भनाइले शाखा र नगरप्रमुखकै सल्लाहमा भुक्तानी भएको देखिन्छ । 

अन्नपूर्ण आबिका प्रअ अमरबहादुर शाही नगर प्रमुख धर्मराज शाहीको नातामा सालो पर्नुहुन्छ । बढी भुक्तानी भएको रकम असुलउपर गर्न शाखाले पनि आनाकानी गरेको एक कर्मचारीले बताउनुभयो । 

कर्मचारीका अनुसार ठेक्कामा पनि सम्झौताभन्दा बढी भुक्तानी दिने, आफ्ना नातेदारलाई यसरी बहाना बनाएर रकम बाँड्ने काम नगर प्रमुखकै इसारामा भइरहेको बताउनुभयो । केही बोलौँ भने निसानामा परिने डर छ । त्यसैले आफ्नो काम गर्ने हो, जाने हो । नगरपालिकाले एकपछि अर्को मनोमानी गरिरहेको कसैले पनि नदेख्ने गरेको कर्मचारीको गुनासो छ । 

उता आबिका विद्यालय व्यवस्थापन समिति अध्यक्ष बल सार्कीले १० लाख नभएर ९ लाख ४२ हजार बढी भुक्तानी आएको स्वीकार गर्नुभयो । विद्यालय व्यवस्थापन समितिका अध्यक्ष सार्की कालाशिल्ला माध्यमिक विद्यालयको पनि लेखापाल हुनुहुन्छ ।