अमरराज नहर्की
तनहुँ, असार २३ गते। तनहुँमा झण्डै चार महिनापछि सवारी चालक अनुमतिपत्र (लाइसेन्स)को लिखित तथा प्रयोगात्मक परीक्षा पुनः सुरु भएको छ। बन्दीपुर गाउँपालिका–४ विमलनगरस्थित यातायात व्यवस्था कार्यालय तनहुँले आइतबारबाट पुनः ट्रायल परीक्षा सुरु गरेको छ।
गत चैत १ गतेदेखि कार्यालयले परीक्षा स्थगन गरेको थियो। सवारी चालक अनुमतिपत्रका लागि फारम भरेका सेवाग्राहीको ‘बायोमेट्रिक’ सुरु गरिएको निमित्त प्रमुख कमला द्वारेले जानकारी दिनुभयो।
नयाँ सेवाग्राहीलाई पनि चाँडै नै सेवा सुरु गरिने उहाँले बताउनुभयो। झण्डै चार महिनासम्म दुई पाङ्ग्रे, चार पाङ्ग्रे र अटोरिक्साको सवारी चालक अनुमतिपत्रका लिखित तथा प्रयोगात्मक परीक्षासम्बन्धी सम्पूर्ण कार्य बन्द थियो।
सिद्धगुफा ड्राइभिङ सेन्टरका सञ्चालक लालकुमार श्रेष्ठ सार्वजनिक जग्गा मिचेर ‘ट्रायल सेन्टर’ बनाएको जनाउँदै अख्तियार दुरुपयोग अनुसन्धान आयोगमा उजुरी परेको थियो।
यसपछि आयोगले तत्कालका लागि प्रयोगात्मक परीक्षा स्थगित गर्न कार्यालयलाई निर्देशन दिएको थियो। वि.सं. २०७८ फागुन २७ गते तनहुँमा कार्यालय स्थापना भएको थियो। कार्यालयले विसं २०७९ कात्तिकबाट सवारी चालक अनुमतिपत्रको ‘ट्रायल’ जिल्लाबाटै सुरु गरेको थियो। यसअघि ट्रायलका लागि पोखरा जानुपथ्र्यो।
कार्यालयले २०७९ सालको साउन १५ गतेदेखि लाइसेन्स नवीकरण सुरु गरेको थियो। कार्यालयमा सवारी साधन दर्तासमेत हुन्छ। यसले गर्दा तनहुँ मात्र नभई गोरखा, लमजुङका सर्वसाधारणलाई सहज भइरहेको छ।
वि.सं २०७१ देखि यातायात व्यवस्था सेवा कार्यालयको रुपमा काम गर्दै आइरहेको कार्यालय वि.सं. २०७८ फागुन २७ गते यातायात व्यवस्था कार्यालयको रुपमा स्थापना भएको हो।
सेवा कार्यालयको रुपमा रहँदा सवारी साधन कर सङ्कलन, ‘रुट परमिट’, जाँचपाससम्बन्धी काम गर्दै आएको कार्यालयले हाल सवारी चालक अनुमतिपत्र वितरण, नवीकरण र सवारी साधन दर्ता, नामसारी सेवा दिँदै आएको छ। सेवा सञ्चालनमा आएसँगै सेवाग्राहीलाई टाढा धाउनुपर्ने बाध्यता हटेको थियो।
