गोरखापत्र समाचारदाता
काठमाडौं, जेठ १४ गते । नेपाल प्रेस युनियनको ३३ औं स्थापना दिवसको अवसरमा नेपाल प्रेस युनियन गोरखापत्र प्रतिष्ठान शाखाले सोमबार शुभकामना आदन–प्रदान एवं सम्मान कार्यक्रम आयोजना गरेको छ ।
कार्यक्रमका प्रमुख अतिथि राष्ट्रपति रामचन्द्र पौडेलका प्रेस सल्लाहाकार किरण पोखरेलले प्रेस र अभिब्यक्ति स्वतन्त्रता लोकतन्त्रको पर्याय भएको बताउनुभयो । उहाँले लोकतान्त्रिक ब्यवस्थामा मात्र प्रेस र अभिब्यक्ति स्वतन्त्रताको सम्मान हुने धारणा राख्नुभयो ।
वर्तमान अवस्थामा सरकारी सञ्चार माध्यमले थप जिम्मेवार भएर आम जनताप्रति उत्तरदायी बन्दै समाचार सामग्रीहरु पस्किनु पर्ने बताउनुभयो । पूर्व सूचना आयुक्त समेत रहनु भएका पोखरेलले सरकारी सञ्चार माध्यम भनेको जो सत्तामा हुन्छ उसैको हो भन्ने भाष्य निर्माण भएकाले त्यसलाई चिर्दै आगाडि बढ्नु पर्ने बताउनुभयो ।
उहाँले वर्तमान समयमा सामाजिक सञ्जालले पस्कने भ्रामक समाचारले आम जनतालाई दिगभ्रमित पारिरहको अवस्थामा सही सूचना प्रदान गर्न सकेमा लोकतन्त्र थप सुदृढ हुने विश्वास ब्यक्त गर्नुभयो ।
गोरखापत्र संस्थानका कार्यकारी अध्यक्ष विष्णुप्रसाद सुवेदीले गोरखापत्र सधैं राज्य र जनताप्रति जवाफदेही रहँदैआएको बताउनुभयो । उहाँले भन्नुभयो, ‘‘गोरखापत्र संस्थानका प्रकाशनले सही र प्रमाणित समाचार, समसामयिक विचारहरु पस्केर एकातार्फ ब्यावसयिक पत्रकारिताको धर्म निर्वाह गर्दैआएको छ । अर्कोतर्फ यसले बजारको प्रतिस्पर्धा खरो उत्रेर आफ्ना खर्चहरुको ब्यवस्थापन गर्दै नाफा समेत आर्जन गरेर बार्षिक करोडौं रुपियाँ सरकारलाई कर तिर्दै आएको छ ।’’
आगामी दिनमा पनि गोरखापत्रले आफ्नो पेशागत निष्ठाप्रति अविचलित भएर अगाडि बढ्ने बताउनुभयो । संस्थानलाई थप सुदृढ बनाउने काममा नीतिगत सुधारको काममा वर्तमान ब्यवस्थापन लागिरहेको प्रष्ट पार्नुभयो ।
नेपाल प्रेस युनियनका अध्यक्ष शिव लम्सालले श्रमजीवि पत्रकारको हक अधिकारका लागि प्रेस युनियन सधैं अग्रपङ्तिमा रहँदैआएको बताउनुभयो । प्रेस युनियन गोरखापत्र प्रतिष्ठान शाखाका अध्यक्ष राधा चालिसेले गोरखापत्रको श्रमजीवि पत्रकारका हक अधिकारका लागि युनियनले ब्यवस्थापनसँग राख्दै आएका केही माग पूरा भएको र केही पूरा गर्न बाँकी रहेको बताउनुभयो ।
गोरखापत्र प्रतिष्ठान शाखाका पूर्व अध्यक्ष सरोज अधिकारीले युनियनको प्रतिष्ठान शाखा स्थापनाको लागि गर्नुभएको विशेष योगदानको कदर गर्दै उहाँलाई सम्मान गरिएको छ ।
सो अवसरमा गोरखापत्र दैनिकका सहसम्पादक स्वर्गीय शेषकान्त पण्डितको छोरी समृद्धि पण्डितको शिक्षाका लागि पर्यटन ब्यवसायी श्याम चालिसेले उपलब्ध गराउनु भएको २५ हजार रुपियाँको सहयोग युनियनका कोषाध्यक्ष सुकृत नेपाललाई हस्तान्तरण गर्नुभयो ।
