तोकिएको समयमै सिड समितिमा जवाफ पेश गरिनुपर्ने

काठमाडौँ, वैशाख ३१ गते । महिला विरुद्ध हुने सबै प्रकारका भेदभाव उन्मूलन गर्ने महासन्धि (सिड) समितिमा पेश भएको प्रतिवेदनमा प्राप्त भएका सुझावका आधारमा छिटो लिखित जवाफ फर्काउनुुपर्नेमा जोड दिइएको छ । 

महिला, कानुन र विकास मञ्च र सेन्टर फर रिप्रडक्टिभ राइट्सले आयोजना गरेको छलफल कार्यक्रममा नेपालले सिड समितिमा हालै पेश गरेको सातौँ प्रतिवेदनमा समिति सदस्यले दिएको प्रतिक्रियाका आधारमा जवाफ पठाउनका लागि प्राप्त भएका स्वास्थ्य अधिकारसम्बन्धी बुँदामा कार्यक्रमका सहभागीले विचार राख्नुभएको थियो । समितिमा पेश भएको मितिले ९० दिनभित्र जवाफ पेश गर्नुपर्ने व्यवस्था रहेको सो अवसरमा जानकारी गराइएको थियो ।

कार्यक्रममा प्रतिनिधिसभा, महिला तथा सामाजिक मामिला समितिका सभापति किरणकुमार साहले महासन्धिले लैङ्गिक समताका लागि काम गर्न विभिन्न देशका सरकारलाई बाध्य पार्ने गरेको बताउनुभयो । समितिले शिक्षा र स्वास्थ्यमा महिलाको समान पहुँच हुने गरी कानुन बनाउने प्रतिबद्धता उहाँको थियो । प्रतिनिधिसभा, शिक्षा, स्वास्थ्य तथा सूचना प्रविधि समितिका सभापति अम्मरबहादुर थापाले विद्यालय र उच्च शिक्षामा पनि लैङ्गिक समताका लागि जनचेतनामूलक पाठ्यसामग्री राखिनुपर्नेमा जोड दिनुभएको थियो । 

सुरक्षित मातृत्वसम्बन्धी ऐन संशोधनका लागि पहल गर्ने प्रतिबद्धता उहाँले जनाउनुभएको थियो । कार्यक्रममा स्वास्थ्य तथा जनसङ्ख्या मन्त्रालयका उपसचिव रोशनीदेवी कार्की, महिला, बालबालिका तथा ज्येष्ठ नागरिक मन्त्रालयका उपसचिव राजनकुमार बिसी, मञ्चका कार्यकारी निर्देशक सविन श्रेष्ठ, सेन्टर फर रिप्रडक्टिभ राइट्सका अधिवक्ता प्रभाकर श्रेष्ठलगायतले ९० दिनमा नेपालले लिखितरुपमा पेश गर्नुपर्ने जवाफका लागि सहयोग पुगोस् भनी कार्यक्रम आयोजना गरिएको जानकारी गराउनुभएको थियो । रासस