मुना हमाल
सुर्खेत, चैत २९ गते । कर्णाली प्रदेशका नवनियुक्त मुख्यमन्त्री यामलाल कँडेलले स्रोत र साधनको सही सदुपयोग गर्नुपर्ने बताउनुभएको छ ।
मुख्यमन्त्री भएपछि पहिलो पटक बिहीबार प्रदेश सभाको बैठकमा धारणा राख्नुहुँदै मुख्यमन्त्री कँडेलले प्राप्त स्रोत साधनको समयमै सही सदुपयोग नहुँदा समस्या आएको बताउनुभयो ।
उहाँले भन्नुभयो, ‘कर्णालीमा जति स्रोत साधन हुनुपर्ने हो, त्यो नभए पनि जति हामीले प्राप्त गरेका छौँ, त्यसलाई समयमै प्रयोग नगर्दा समस्या आएको छ । यसलाई बदल्ने र सच्चाउने मेरो पहिलो प्राथमिकता हुनेछ ।’
सबै प्रदेश सभा सदस्यहरू सहमत भए कतिपय नीतिहरू पनि पुनर्विचार गर्नुपर्ने आवश्यक रहेको भन्दै विकासको गति निर्माण गर्न सकिने उहाँले चर्चा गर्नुभयो । जनताको अपेक्षा भरोसा र विश्वासलाई स्थापित गर्न सन्तुलित विकासको अवधारणा, योजना र बजेट छान्न आवश्यक रहेको उहाँको भनाइ छ ।
मुख्यमन्त्री कँडेलले अहिले अवस्थाबारेमा आफू बुझ्ने प्रक्रियामा रहेको त्यसपछि आफ्ना योजना सार्वजनिक गर्ने बताउनुभयो । उहाँले परिणाम नल्याउँदा जनतामा निराश छाएको उल्लेख गर्दे थोरै भए पनि यसलाई सुधार गर्ने कुरामा प्राथमिकता दिने प्रतिबद्धता जनाउनुभयो ।
