हृदयको अँगेनाभरि
बलिरहेछ
चाहनाको आगो
उठिरहेछ
वेदनाको मुस्लो
र चलिरहेछ
चिन्ताको हुरी ।
हवाइजहाजमा
उडेर अगाडि बढिरहँदा
पछाडि छुटिरहेछन्
घरपरिवार र प्रियजनहरू
सहत्व र अपनत्वका सम्बन्धहरू
टाढिइरहेछ स्वदेश
र चस्किरहेछ मुटु ।
हो, स्वदेश मुटु
र राष्ट्रियता धड्कन हो
धड्किरहन्छ सधैँभरि
सभ्यता गौरव
र संस्कृति सौरभ हो
मगमगाइरहन्छ सधैँभरि
स्वाभिमान हिमाल
र आस्था उचाइ हो
अग्लिरहन्छ सधैँभरि ।
