विष्णुप्रसाद पोखरेल
दमक, वैशाख १३ गते । झापाको दक्षिणी सीमावर्ती गाउँपालिकाहरूमा भारतबाट अवैध रूपमा मकै आउने गरेको पाइएको छ । भारतबाट सवारी साधनमा हालेर नै अवैध रूपमा मकै ल्याउने गरेको पाइएको हो ।
जिल्ला प्रहरी कार्यालय झापाका अनुसार गौरीगञ्ज गाउँपालिका वडा नं. २ स्थित आँपगाछीमा प्रहरीले एक ट्याक्टर मकै नियन्त्रणमा लिएको छ । भारतबाट अवैध रूपमा ल्याइएको मकैसहित मे १ त ७११० नम्बरको ट्याक्टर नियन्त्रणमा लिइएको जिल्ला प्रहरी कार्यालय झापाका प्रवक्ता खगेन्द्रप्रसाद रिजालले बताउनुभयो ।
ट्याक्टरमा हालेर भारतबाट ल्याइएको ८८ बोरा मकैसहित ट्याक्टर इलाका प्रहरी कार्यालय गौरीगञ्जको टोलीले मङ्गलबार बिहान ७ बजे नियन्त्रणमा लिएको पनि रिजालले जानकारी दिनुभएको छ ।
भन्सार छलेर ल्याइएको मकैसहित ट्याक्टरलाई प्रहरीले मेची भन्सार कार्यालय काँकडभिट्टा बुझाएको छ ।
