काठमाडौँ, फागुन २ गते । पूर्व गृहमन्त्री एवम् नेपाली कांग्रेसका नेता बालकृष्ण खाणसँग नेपाल भ्रमणमा रहनु भएका भारतीय विदेश सचिव विनयमोहन क्वात्राले भेटवार्ता गर्नुभएको छ ।
काठमाडौँमा भएको भेटमा दुई देशको आपसी सम्बन्ध, नेपालको राजनीति र समसामयिक विषयमा छलफल भएको छ ।
पूर्व गृहमन्त्री खाणले विदेश सचिव क्वात्रासँग लुम्बिनी विकास कोषको गुरुयोजना निर्माणबारे भारतीय प्रधानमन्त्री नरेन्द्र मोदी लुम्बिनीको भ्रमणमा आएको बेलामा तत्कालीन प्रधानमन्त्री शेरबहादुर देउवासँग भएको कुराकानीबारे पुनः जानकारी गराउनु भएको छ ।
भारतीय प्रधानमन्त्री मोदीले लुम्बिनीको भ्रमणका बेला लुम्बिनीको गुरुयोजना निर्माणमा सहयोग गर्ने बताउनु भएको थियो ।
त्यस्तै, पूर्व गृहमन्त्री खाणले भैरहवामा रहेको गौतमबुद्ध विमानस्थलमा नियमित उडानको वातावरण निर्माण गर्न वातावरण निर्माण गर्ने विषयमा क्वात्रासँग छलफल गर्नुभएको छ ।
त्यस्तै, थप हवाई रुट दिन पहल गरिदिन पनि आग्रह गर्दै पूर्व मन्त्री खाणले भारतीय प्रधानमन्त्री मोदीले लुम्बिनी भ्रमणका क्रममा थप हवाई रुटबारे पहल गर्ने आश्वासन दिनुभएको स्मरण गराउनु भयो ।
पूर्व मन्त्री खाणले त्यसबारे पुनः प्रधानमन्त्री मोदीलाई सम्झाउन र पहल गर्न विदेश सचिव क्वात्रासँग आग्रह गर्नुभयो ।
