काठमाडौं, पुस १८ गते । पोखरा एभेन्जर्स नेपाल टी–२० क्रिकेट लिगको लयमा फर्किएको छ । सुरुवाती खेलमा हार खेपेको पोखराले पछिल्लो तीन खेलमा लगातार जित निकाल्दै अघिल्लो चरणमा पुग्ने सम्भावना कायम राखेको छ । त्रिवि क्रिकेट मैदान कीर्तिपुरमा सोमबार भएको खेलमा पोखराले काठमाडौं नाईट्सलाई पाँच विकेटले हरायो ।
काठमाडौंले दिएको एक सय ६५ रनको विजयी लक्ष्य पछ्याएको पोखराले १९.४ ओभरमा पाँच विकेटको क्षतिमा लक्ष्य पूरा गरेको थियो । पोखराको जितमा सुमित महर्जन र उपुल थरंगाले उत्कृष्ट प्रदर्शन गर्नुभयो । महर्जनले ७६ र थरंगाले ५८ रन बनाउनुभयो । कुशल मल्लले अविजित १४ रन बनाउनुभयो । बलिङमा काठमाडौंका कमल सिंह ऐरीले तीन विकेट लिनुभयो । अविनाश बोहोरा र अनिल खरेलले एक एक विकेट झार्नुभयो ।
यसअघि पहिले ब्याटिङ गरेको काठमाडौंले निर्धारित २० ओभरमा चार विकेटको क्षतिमा एक सय ६४ रन बनाएको थियो । काठमाडौंका लागि एलेक्स ब्लेकले सर्वाधिक ६४ रन बनाउनुभयो । सुनाम गौतमले ४५ र विरनदिप सिंहले ३२ रन बनाउनुभयो । बलिङमा पोखराका तुलबहादुर थापाले दुई तथा प्रतिस जिसी र कुशल मल्लले एक एक विकेट लिनुभयो ।
लिगमा आठ खेल सकेको पोखरा ६ अङ्कसहित चौथो स्थानमा छ । ६ खेलबाट ६ नै अङ्क बनाएको काठमाडौं तेस्रो स्थानमा छ । पुस २७ गतेसम्म सञ्चालन हुने लिगमा ६ टोलीको सहभागिता रहेको छ । सहभागी टोलीले डबल राउन्ड रोबिन लिगका आधारमा प्रतिस्पर्धा गर्नेछन् । लिगको विजेताले ५५ लाख र उपविजेताले ३० लाख रुपियाँ पुरस्कार पाउनेछन् ।
