प्रेमराज सिम्खडा
कालीकोट, मङ्सिर २५ गते । गत कात्तिक २२ गते यता पटक पटक सुदूरपश्चिमलाई केन्द्रबिन्दु बनाएर आएको भूकम्पको असर कालीकोटमा परेको छ । एक महिनासम्म स–साना भूकम्पका धक्काको असर कालीकोटको पचालझरना –८ को मयगाउँमा देखिएको छ ।
वडा नं ८ मयटोलको दलित बस्तीका ४० घर भासिँदै गएपछि सबैले भूकम्पको असर भनेर चित्रण गरेका छन् । मयगाउँका कर्णवीर कामीले कात्तिक २२ गते भूकम्पको ठूलो धक्का आएदेखि जमिन भासिन सुरु गरेको बताउनुभयो । त्यो दिन हामी सबै घरबाहिर आयौँ । अस्तिको भूकम्पको असरले घरको पर्खालमा चिरा परेका छन् भने जमिनमा पनि चिरा परेको छ ।
पचालझरना गाउँपालिका –६ का वडा अध्यक्ष प्रभुजन सञ्ज्यालले आफू काम विशेषले मयगाउँमा गएका बेला दलित बस्ती भासिएको देख्दा चिन्ता लागेको सुनाउनुभयो । आफूले तत्काल गाउँसभामा बोलाउन अध्यक्ष र प्रमुख प्रशासकीय अधिकृतलाई समेत अनुरोध गरेको र सो बस्तीका बारेमा गम्भीर नबने ठूलो क्षति बेहोर्नुपर्ने बताउनुभयो । पूर्व गाउँपालिकाका अध्यक्ष खड्कराज सेजुवालले सामाजिक सञ्जालमा जमिन भासिएको गाउँको तस्बिर सार्वजनिक गर्दै तत्काल बस्ती अन्यत्र सार्न आग्रह गर्नुभयो ।
मयगाउँका ४० घर उच्च जोखिममा छन् । स्थानीय रति कार्कीले नियमित जमिन भासिइरहेकाले स्थानीयमा त्रास फैलिएको बताउनुभयो । विपद् व्यवस्थापन समितिका संयोजक तथा प्रमुख जिल्ला अधिकारी रामहरि शर्माले गाउँपालिकाको विपद् व्यवस्थापन समितिको बैठक बसेर गाउँको अनुगमनसहितको प्रतिवेदन आफूकहाँ आएमा आफूले गृह मन्त्रालयको विपद् व्यवस्थापन शाखालाई लेखी पठाउने बताउनुभयो ।
बस्तीको तल कर्णाली कोरिडोर छ । कोरिडोर पनि बगिरहेको छ । सुख्खा पहिरो गएर दैनिक सडकमा अवरोध आइरहेको छ । मुनि कर्णाली नदी बगिरहेको छ ।
