काठमाडौं, कात्तिक १४ गते । शाीर्षटोली आर्सनल र म्यानचेस्टर युनाइटेडले इङ्लिस प्रिमियर लिग फुटबलमा जित निकालेका छन् । घरेलु मैदानमा आइतबार राति भएको खेलमा आर्सनलले नटिङ्घम फरेस्टलाई ५–० गोलले हरायो । अर्को खेलमा युनाइटेडले वेस्टहामलाई १–० गोलले स्तब्ध बनायो ।
आर्सनलको जितमा रेइस नेल्सनले दुई गोल गर्नुभयो । गाब्रियल मार्टिनेली, थोमस पार्टी र मार्टिन ओडेगार्डले एक एक गोल गर्नुभएको थियो । खेलभर बलियो टोली आर्सनलको दबाब झेलेको नटिङ्घमले गोल गर्न लायक अवसर बनाउन सकेन ।
जितसँगै शीर्षस्थानमा फर्किएको आर्सनलले १२ खेलबाट ३१ अङ्क बनाएको छ । पराजित नटिङ्घम नौ अङ्कसहित तालिकाको अन्तिममा छ । दोस्रो स्थानमा रहेको म्यानचेस्र सिटीको २९ अङ्क छ ।
अर्को खेलमा युनाइटेडलाई जिताउन मार्कुस रासफोर्डले ३८औँ मिनेटमा गरेको गोल निर्णायक बन्यो । जितसँगै युनाइटेड पाँचौँ स्थानमा उक्लिएको छ । युनाइटेडले १२ खेलबाट २३ अङ्क बटुलेको छ । पराजित वेस्टहाम १४ अङ्कसहित १३औँ स्थानमा छ । एजेन्सी
