प्युठानमा पहिरोले चार घर पुरियो

सुजल श्रेष्ठ

प्युठान, असोज २१ गते । अत्यधिक वर्षाका कारण जिल्लाको माण्डवी गाउँपालिका–४ फरिण्डेमा पहिरोले चार घर पुरिएको छ । स्थानीय बोमबहादर बुढामगरको घरसहित चार घर पहिरोले पुरिएको वडा अध्यक्ष डिलबहादुर घर्तीले बताउनुभयो ।

घटनामा बोमबहादुर राहुँमगरको घरमा रहेका ६ जना व्यक्ति घरभित्र पुरिएको वडा अध्यक्ष घर्तीले जानकारी दिनुभयो । अरु घरका व्यक्तिहरुलाई सुरक्षित स्थानमा लगिएको छ ।

बेपत्ता हुनेहरुमा ६० वर्षीय श्रीमान बोमबहादुर राहुँ र श्रीमतीसहित २१ वर्षीय टेकी राहुँमगर, ४ वर्षीय सुशान राहुँ, ६० वर्षीया हीराबहादुर थापा र १८ वर्षीया मौसमी थापामगर रहेको स्थानीय यादप पौडेलले जानकारी दिनुभयो ।

पहिरोले घर पुरिएको खबर प्राप्त भएपछि घटनास्थलमा जिल्लाबाट प्रहरीको टोली गएको प्रहरी निरीक्षक सुशील थापामगरले जानकारी दिनुभयो । प्रहरीका अनुसार माण्डवी १ स्थित अरङ खोलाले बगाउँदा ३५ वर्षीय धनबहादुर सुनार बेपत्ता भएका छन् । यसअघि दशैंको दिन ऐरावती–५ जाडीखोलाले बगाएका ५ वर्षीय सुसन सुनार फेला परेका छैनन् ।