.jpeg)
केशब राज भट्ट
वाशुलिङ बैतडी, चैत ७ गते । बैतडीको झ्याउलेक मोडस्थित जयपृथ्वी राजमार्गमा ट्रक दुर्घटना हुँदा चालकसहित चार जना घाइते भएका छन् ।
नेपालगञ्जबाट बझाङतर्फ जाँदै गरेको सु.प.प्र. ०१००१ ख २८०९ नम्बरको करिब २० टन सिमेन्ट बोकेको ट्रक शुक्रबार राति करिब २ः१५ बजे दुर्घटनामा परेको हो । दुर्घटनापछि ट्रक सडकबाट करिब २०–२५ मिटर तल खसेको प्रहरीले जनाएको छ ।
दुर्घटनामा घाइते भएका चारै जनाको डडेल्धुरा अस्पतालमा उपचार भइरहेको छ । घाइतेमध्ये २५ वर्षीया निर्मला बिष्टको टाउकोमा चोट लागेको छ भने उहाँको अवस्था सामान्य रहेको छ । साथै उहाँका सात वर्षीय छोरा अविषेक बिष्टको टाउको र पाखुरामा चोट लागेको छ भने चार वर्षीय प्रियान्स बिष्टको अवस्था सामान्य रहेको छ । यस्तै, चालक ३६ वर्षीय कृष्ण बिष्ट सामान्य घाइते हुनुभएको छ ।
दुर्घटनाका कारण खुल्न नसकेको र यसबारे थप अनुसन्धान भइरहेको प्रहरी चौकी खोडपेका प्रहरी नायब निरीक्षक उदय खडायतले जानकारी दिनुभयो ।
