न्युयोर्क, पुस १६ गते । अमेरिकी वामपन्थी युवा अग्रगामी जोहरान ममदानीले बुधबार न्युयोर्कको मेयर पदभार ग्रहण गर्न लाग्नु भएको छ । सन् २०२६ को मध्यरातमा ममदानीले संयुक्त राज्य अमेरिकाको सबैभन्दा ठूलो सहरको नेतृत्व गर्दै एक परित्यक्त सबवे स्टपमा शपथ लिनु हुने छ । उहाँ न्युयोर्कको पहिलो मुस्लिम मेयर बन्नु हुने छ ।
३४ वर्षीय डेमोक्रेट ममदानीले जीवनयापनको बढ्दो लागत, भाडा नियन्त्रण, विश्वव्यापी बाल हेरचाह र निःशुल्क सार्वजनिक यातायात जस्ता मुद्दामा सुधार गर्ने वाचा गर्दै अभियान चलाउनु भएको थियो । तर, एक वर्षअघि लगभग अज्ञात रहनु भएका उहाँले कसरी आफ्नो महत्वाकांक्षी एजेन्डा पूरा गर्न सक्नु हुन्छ भन्ने कुरा हेर्न बाँकी छ ।
न्युयोर्क विश्वविद्यालयका प्राध्यापक जोन केनले भन्नुभयो, “प्रतीकात्मकता मतदातासँग मात्र जान्छ, नतिजा अझ महत्वपूर्ण हुन्छ ।” राष्ट्रपति डोनाल्ड ट्रम्पले ममदानीको आलोचना गर्दै ‘कम्युनिस्ट पागल’ भन्नु भएको थियो । तर नोभेम्बरमा ह्वाइट हाउसमा दुवैबिच आश्चर्यजनक रूपमा सौहार्दपूर्ण वार्ता भएको थियो । राजनीतिक विश्लेषक र कोलम्बिया विश्वविद्यालयका प्राध्यापक लिङ्कन मिचेलले भेटलाई ‘ममदानीको दृष्टिकोणबाट उत्कृष्ट’ भन्नुभएको छ ।
तर, आप्रवासी छापा र ट्रम्पको बढ्दो दमनले चुनौती सिर्जना गर्न सक्छ । ममदानीले आप्रवासी अधिकारको रक्षा गर्ने वाचा गर्नु भएको छ र ट्रम्पको नीतिसँग भिडन्तमा तयार हुनुहुन्छ । न्युयोर्कका महान्यायाधिवक्ता लेटिटिया जेम्सले ममदानीको निजी शपथ ग्रहण गराउनु हुने छ । बिहीबार हुने औपचारिक उदघाटन कार्यक्रममा वामपन्थी सहयोगी सिनेटर बर्नी स्यान्डर्स र सांसद अलेक्जान्ड्रिया ओकासियो-कोर्टेजले भाषण दिनु हुने छ ।
सिटी हल बाहिर लगभग चार हजार पाहुना उपस्थित हुने अपेक्षा गरिएको छ । ममदानीको टोलीले ब्लक पार्टी आयोजना गरेको छ, जसले हजारौँ न्युयोर्कवासीलाई सडक दृश्य क्षेत्रबाट समारोह हेर्न सक्षम बनाउने छ । मेयर निर्वाचित भएपछि उहाँ क्विन्सको भाडा-नियन्त्रित अपार्टमेन्टबाट म्यानहट्टनको आधिकारिक हवेलीमा सर्नु हुने छ, जुन मुख्यतः सुरक्षा कारणले गरिएको छ ।
युगान्डामा भारतीय मूलको परिवारमा जन्मेका ममदानी सात वर्षको उमेरमा न्युयोर्क आउनु भएको हो । छोटो राजनीतिक कार्यकाल भए पनि उहाँ राज्य सभाको सदस्य रहिसक्नु भएको छ । अनुभवहीनतालाई पूर्ति गर्न उहाँले विगतका मेयर कार्यालय र पूर्वराष्ट्रपति जो बाइडेन प्रशासनका अनुभवी सहयोगीसँग आफूलाई घेर्नु भएको छ ।
व्यापारिक नेतासँग संवाद खुला राख्दै उहाँले आफ्नो नीतिले धनी न्युयोर्कवासीको पलायनको भविष्यवाणी गर्ने दाबीको खण्डन गर्नुभयो । प्यालेस्टिनी अधिकारको रक्षकका रूपमा उहाँले यहुदी समुदायलाई समावेशी नेतृत्वको आश्वासन दिनु हुने छ । हालै वर्षौअघि यहुदी विरोधी ट्वीट सार्वजनिक भएपछि उहाँका केही कर्मचारीले राजीनामा दिएका थिए । ममदानीले आफ्नो नेतृत्वमा न्युयोर्कलाई समावेशी र न्यायोचित सहर बनाउन प्रतिबद्धता व्यक्त गर्नु भएको छ । रासस/एएफपी
