शिवकुमार रिजाल (काशी)
मनहरी (मकवानपुर), पुस १६ गते । दुर्गम गाउँबस्तीका कृषिजन्य उत्पादनको प्रबर्धनका लागि मकवानपुरको राक्सिराङ गाउँपालिकाले पाक्षिक हाटबजार सुरु गरेको छ । हरेक बर्षझैँ यसबर्ष पनि जाडोयाममा हाटबजार सञ्चालनमा ल्याइएको हो ।
राक्सिराङ गाउँपालिका –५ चैनपुरमा स्थापना भएको हाटबजार स्टलमा पुस १५ गतेबाट सुरु भएको हाटबजार जेठ १५ गतेसम्म हरेक महिनाको १ र १५ गते सञ्चालन हुने राक्सिराङ गाउँपालिका कृषि विकास शाखाले जनाएको छ ।
कृषि विकास शाखाका प्रमुख कृष्ण डुम्रेका अनुसार पहिलो दिनको हाटबजारमा १६ वटा स्थान उपजका स्टलहरु सहभागी भएका थिए । राक्सिराङ गाउँपालिकामा उत्पादन भएका तरुल, पिँडालु, कोदो, फापर, गहत, मास, मस्याङ, रायोको साग, चिउरीबाट उत्पादित मह लगायतका घरेलु खाद्य सामग्रीहरु हाटबजारमा उपलब्ध छन् ।
हाटबजारको उद्घाटन गर्दै जिल्ला समन्वय समितिका प्रमुख ललित घलानले स्थानीय उत्पादनले रैथाने बाली जोगाउन महत्वपूर्ण भूमिका निर्बाह गर्ने बताउनुभयो । कार्यक्रममा गाउँपालिका अध्यक्ष राजकुमार मल्लले यो बर्षभरि नियमित र अर्गानिक खानेकुरा, फलफुल तथा तरकारी प्रदर्शन गर्ने किसान वा फर्मलाई प्रथम पुरस्कार ५० हजार, द्वित्तीय पुरस्कार २५ हजार र तृत्तीय पुरस्कार १० हजार उपलब्ध गराइने घोषणा गर्नुभयो ।
कार्यक्रममा गाउँपालिका उपाध्यक्ष बनस्तम थिङ, प्रमुख प्रशासकीय अधिकृत सन्देश मास्केसहित विभिन्न राजनीतिक पार्टी, सहकारी लगायतका प्रतिनिधिले शुभकामना ब्यक्त गर्नुभएको थियो ।
