अविनाश चौधरी
धनगढी, असोज ११ गते । दसैँ, तिहारजस्ता चाडपर्वको लागि धनगढीमा धनगढीकै किसानका फूल बिक्रीको काम धमाधम भइरहेको छ । यहाँ फूलखेती गर्दैआएका किसानको फूल धनगढी उपमहानगरपालिका परिसरमा रहेको फूल बिक्री केन्द्रबाट बिक्री गर्न थालिएको हो ।
धनगढीमा प्लाष्टिकजन्य फूल, माला बिक्री वितरणमा प्रतिबन्ध लगाइएको छ । प्लाष्टिकजन्य माला बिक्रीमा रोक लगाइएपछि धनगढीमा १७ जना कृषकले तालिम लिएर व्यावसायिक फूल खेतीको काम गर्दैआएका छन् ।
किसानले उत्पादन गरेको फूल पालैपालो बिक्री केन्द्रमा बिक्रीका लागि ल्याइने गरेको फूल बिक्री केन्द्रका सञ्चालक पुष्कर विष्टको भनाइ छ । उहाँले प्रतिकेजी ३५० रुपियाँमा सयपत्री फूल बिक्री भइरहेको जानकारी दिनुभयो । यसैगरी, माला ८० रुपियाँमा बिक्री भइरहेको जनाइएको छ ।
धनगढी उपमहानगरपालिकाले २०७९ बाट धनगढीमा प्लाष्टिकको फूल र माला बिक्री वितरणमा रोक लगाएपछि फूल खेती गर्न चाहेका किसानलाई तालिम पनि दिएको थियो । पहिले फूल उत्पादन त्यसपछि सजावटसम्बन्धी तालिम लिएर किसानले पुष्प खेतीको काम गर्दैआएका छन् ।
केन्द्र सञ्चालक विष्टले वितरण केन्द्रमा कोल्ड च्याम्बर रहेका कारण अन्य समयका लागि पनि फूल, माला सुरक्षित राख्ने गरेको जानकारी दिनुभयो । उहाँले चाडपर्वमा मात्र नभइ फूल, माला, बुकी अन्य समयमा पनि बिक्री हुने गरेको बताउनुभयो ।
