काठमाडौं, असार १४ गते । काठमाडौं विश्वविद्यालय (केयू)ले मास्टर्स इन मिडिया स्टडसज कार्यक्रम सञ्चालनमा ल्याएको छ । मङ्गलबार प्रेस विज्ञप्ति जारी गर्दै यसै वर्षदेखि अध्ययन सुरु गर्ने गरी मिडिया स्टडिज विषय स्नातकोत्तर कार्यक्रम सञ्चालनमा ल्याएको जानकारी केयूले दिएको हो ।
विगत १६ वर्षदेखि स्नातक तहमा सञ्चालन हुँदै आएको मिडिया स्टडिज कार्यक्रमलाई अब स्नातकोत्तर तहमा पनि विस्तार गरिएको छ ।
काठमाडौं विश्वविद्यालयस्थित भाषा तथा आमसञ्चार विभागका प्रमुख सुधांशु दाहालले मिडिया स्टडीज कार्यक्रम स्नातकोत्तर गर्न चाहने मिडिया तथा सञ्चारकर्मीहरुका लागि यो सुनौलो अवसर हुने बताउनुभयो ।
आमसञ्चार र पत्रकारिता विषय नेपालका अन्य विश्वविद्यालयमा पढाइ हुँदै आए पनि मिडिया स्टडिज काठमाडौं विश्वविद्यालयमा सञ्चालित एक पृथक् कार्यक्रम रहेको उहाँको भनाइ छ । यहाँ भर्ना हुने विद्यार्थीहरुले समाज, संस्था, संस्कृतिक तथा प्रविधिलाई आधारशिला मानी सञ्चारमाध्यमका विभिन्न आयामको अध्ययन गर्नेछन् ।
प्रमुख दाहालका अनुसार केयूको मिडिया स्टडिज कार्यक्रममा प्रविधिक सीप र सैद्धान्तिक ज्ञानको सम्मिश्रण पाइने भएकाले यहाँबाट दीक्षित हुनेहरुको बजारमा अत्यधिक माग रहने गरेको छ ।
