साहारा लिम्बू
फुङ्लिङ, जेठ २६ गते । ताप्लेजुङका स्थानीय तहहरूले अल्लोलाई प्राथमिकता दिन थालेका छन् । स्थानीय स्तरमा पाइने कच्चा पदार्थको सदुपयोग गरी स्थानीयलाई आर्थिकरूपमा आत्मनिर्भर बनाउने उद्देश्यका साथ अल्लोलाई प्राथमिकता दिन थालेका हुन् ।
आठ गाउँपालिका र एक नगरपालिका गरी नौ स्थानीय तह रहेको जिल्लामा पछिल्लो समय अल्लो उत्पादनसँगै अल्लो सम्बन्धी सिलाइबुनाई तालिमलाई प्राथमिकता राखिएको छ । जिल्लाको मिक्वाखोला गाउँपालिकाले अल्लोको झोला बनाउने एक महिने तालिम तग जेठ १५ गते समापन गरेको थियो । गाउँपालिका १ का ११ जना महिलालाई झोला बनाउने तालिम प्रदान गरेको थियो ।
यस्तै ताप्लेजुङको फुङलिङ नगरपालिका वडा नम्बर १० का १६ जना महिला ६० दिने अल्लो कपडा सम्बन्धी सिलाईबुनाई तालिम लिएर उद्यमी बनिसक्नुभएको छ । उहाँहरूले अहिले अल्लो कपडाबाट विभिन्न किसिमका झोला तयार गरिरहेका छन् । ६० दिने तालिमबाट उद्यमी बनिसक्नुभएका चन्द्रिका लिम्बूले अहिले अल्लोको झोला बुनेर नै मासिक ३० हजार सम्म आम्दानी गरिरहनुभएको छ । आफूले उत्पादन गरेका सामाग्रीको बजारीकरण भएमा भावी दिनमा यसै क्षेत्रमार्फत गुजारा चलाउन सकिने सम्भावना बढेको उहाँ बताउनुहुन्छ ।
स्थानीय स्तरमै पाइने कच्चा पदार्थलाई प्रवर्धन गर्ने र सीप विकाससँगै स्वरोजगार बनाउने उद्देश्यले महिलाहरूलाई ६० दिने सिलाई बुनाई तालिम दिइएको फुङलिङ नगरपालिका १० का वडाध्यक्ष सन्तोष लिम्बूले बताउनुभयो । उहाँका अनुसार उद्यमीहरूले तयार पार्नुभएको झोलालाई खरिद गरि वडा भित्रका विद्यालयका विद्यार्थीहरू प्रदान गर्ने योजना रहेको छ ।
यस्तै अल्लोलाई ब्रान्डिङ गर्न ताप्लेजुङको मैवाखोला गाउँपालिका पनि अघि सरेको छ । गाउँपालिका विगत तीन आर्थिक वर्ष यताबाट अल्लोलाई ब्रान्डिङ गर्ने अभियानमा लागेको हो ।
गाउँपालिका अध्यक्ष विजय प्रकाश वनेमका अनुसार स्थानीय स्तरमा पाइने कच्चा पदार्थको सदुपयोग गर्दै महिला तथा आर्थिक अवस्था कमजोर भएका स्थानीयलाई आर्थिकरूपमा आत्मनिर्भर बनाउने उद्देश्यका साथ पालिका अल्लो ब्रान्डिङमा लागेको हो । गाउँपालिकाले दरखास्त आह्वान गरेर सबै वडाको प्रतिनिधित्व हुने गरी आर्थिक वर्ष २०७९-८० मा अल्लोबाट धागो बनाउने तालिम प्रदान गरेको थियो । यस्तै गत आर्थिक वर्ष (२०८०-८१) मा अल्लोको धागोबाट कपडा बुन्ने तालिम प्रदान गरेको थियो ।
त्यस्तै चालु आर्थिक वर्षमा भने अल्लोको धागोबाट कपडा तयार गर्ने र विभिन्न डिजाइनका सामग्रीहरू तयार गर्न सक्ने तालिम प्रदान गरेको छ । तालिम गाउँपालिका प्रत्येक वडाबाट प्रतिनिधि हुने गरी १० जनालाई प्रदान गरिएको छ । तालिम सँगै तालिममा सहभागी १० जनालाई एकरएक वटा सिलाई बुनाई गर्ने मेसिन पनि हस्तान्तरण गरेको पालिका अध्यक्ष वनेमको भनाइ छ । उहाँका अनुसार गुणस्तरीय सामाग्री उत्पादन गर्नका लागि यसपछि उक्त तालिम लिएकाहरूलाई पुर्नताजकी तालिम प्रदान गरिने छ ।
साथै उत्पादित सामग्रीहरूलाई बजारीकरणका लागि गाउँपालिकाले सहयोग गर्ने उहाँको भनाइ छ । यस्तै मेरिङदेन गाउँपालिकाले पनि अल्लो प्रशोधन गरी कपडा उत्पादन तथा सामाग्री निर्माण सम्बन्धी सिप विकास तालिम सुरु गरेको छ । गाउँपालिका ४ लिङ्तेपका बासिन्दाका लागि गत जेठ २० गतेबाट ४५ दिने तालिम सुरु गरिएको गाउँपालिका अध्यक्ष युकहाङ वीर हाङ्गाम (डम्बर)ले बताउनुभएको छ ।
स्थानीय स्तरमा पाइने भाङ्ग्रे सिस्नु (अल्लो) बाट धागो बनाएर कपडा बनाइन्छ त्यसपछि झोला, टोपी, कोट, पर्स लगायत विभिन्न डिजाइनका सामग्री तयार गर्ने गरिन्छ ।
