बेइजिङ, चैत २५ गते । अमेरिकी आयातमा ३४ प्रतिशत भन्सार शुल्क लगाएपछि चीनका एक उच्च अधिकारीले अमेरिकी कम्पनीहरूको संरक्षण गर्ने प्रतिज्ञा गरेका छन् । साथै उनले आफ्नो देश विदेशी लगानीका लागि ‘आशाजनक भूमि’ रहने वचन दिएको बेइजिङले सोमबार बताएको छ ।
चीनले गत हप्ता अमेरिकी राष्ट्रपति डोनाल्ड ट्रम्पले ‘मुक्ति दिवस’ मा समान स्तरमा घोषणा गर्नुभएको भन्सार शुल्क विरुद्ध प्रतिशोध लिएको थियो । बेइजिङले चुम्बीकीय प्रतिध्वनि इमेजिङमा प्रयोग हुने ग्याडोलिनियम र उपभोक्ता इलेक्ट्रोनिक्समा प्रयोग हुने यट्रियम गरी सात दुर्लभ खनिज तत्वमा पनि निर्यात नियन्त्रण लागु गरेको छ ।
उप वाणिज्यमन्त्री लिङ जीले आइतबार अमेरिकी कम्पनी प्रतिनिधिहरूको प्यानललाई भन्सार शुल्कले ‘अमेरिकी कम्पनीहरू सहित उद्यमहरूको वैध अधिकार र हितहरूको दृढतापूर्वक संरक्षण गर्दछ’ भन्नुभएको उहाँको मन्त्रालयले बताएको छ । “बिहीबारदेखि लागु हुने ती करहरू संयुक्त राज्य अमेरिकालाई बहुपक्षीय व्यापार प्रणालीको सही मार्गमा फिर्ता ल्याउने उद्देश्यले हो”, उहाँले जिई हेल्थकेयर र मेडट्रोनिक लगायत प्रतिनिधिहरूलाई भन्नुभयो ।
चीनमा व्यापक व्यापारिक चासो राख्ने ट्रम्पका निकट सल्लाहकार एवम् टेक अर्बपति एलन मस्कद्वारा सञ्चालित विद्युतीय वाहन टेस्लाका प्रतिनिधि पनि उपस्थित थिए । “भन्सार शुल्क समस्याको मूल कारण संयुक्त राज्य अमेरिकामा छ”, लिङले भन्नुभयो । उहाँले कम्पनीहरूलाई ‘विश्वव्यापी आपूर्ति शृङ्खलाको स्थिरता कायम राख्न र परस्पर सहयोग र जीत-जीत परिणामहरू प्रवर्धन गर्न संयुक्तरूपमा व्यावहारिक कार्यहरू गर्न’ आग्रह गर्नुभयो ।
सन् २०२४ मा अमेरिकाले चीनलाई एक खर्ब ४४ अर्ब ६० करोड डलरको सामान निर्यात गरेको थियो । यो उसले आयात गरेको चार खर्ब ३९ अर्ब ७० करोड डलरभन्दा निकै कम हो । यसको निर्यातमा प्रमुख क्षेत्रहरूमा विद्युतीय र इलेक्ट्रोनिक उपकरणहरू र विभिन्न इन्धनहरू, साथै तेल बिउ र अन्नहरू समावेश छन् । रासस/एएफपी
