हिमाल पुत्र कामिरिता चौध विश्व कीर्तिमान

धेरै मानिसले जोखिम काम गरेर पनि गिनिज वल्र्ड रेकर्डमा नाम लेखाउन सफल भएका छन् । कामिरिता शेर्पाले पनि जोखिम काम गरेर गिनिज वल्र्ड रेकर्डमा नाम लेखाउन सफल हुनुभएको छ । उहाँले धेरै पटक सगरमाथा आरोहण गर्नुभएको छ । सगरमाथा आरोहण गर्नु निकै जोखिम काम हो । सोलुखुम्बुको थामे गाउँमा ५५ वर्षअघि जन्मनुभएका उहाँलाई विश्वभरि ‘एभरेस्ट म्यान’ नामले चिनिन्छ ।

कामिरिता १२–१३ वर्षको हुँदादेखि नै पर्यटकको भारी बोकेर हिमाल चढ्न थाल्नुभएको हो । उहाँले २४ वर्षको उमेरमा पहिलो पटक सगरमाथाको चुचुरोमा पाइला टेक्नुभयो । विसं २०५५ वैशाख ३० गते उहाँ पहिलो पटक सगरमाथाको चुचुरोमा पुग्नुभएको थियो । उहाँले पछिल्लो पटक २०८१ साल जेठ ९ गते सगरमाथाको आरोहण गर्नुभयो । उहाँ सगरमाथाको चुचुरोमा ३० पटक पुग्ने आरोही हुनुभएको छ । हिमाल आरोहण गरेरै उहाँले १४ वटा विश्व कीर्तिमान बनाउनुभएको छ ।

कामिरिताले बुवा र दाइले गरेको कामलाई पछ्याउँदै हिमाल आरोहण यात्रा सुरु गर्नुभएको हो । कामिरिताले भन्नुभयो, “गाउँका प्रायः सबै जना यही क्षेत्रमा लागेका थिए । त्यही भएर मैले पनि हिमाल चढ्ने बाटो रोजेँ ।”

हामी सबैलाई हिउँ देख्दा खुसी लाग्छ र अहिले नै त्यहाँ पुगिहालौँ जस्तो लाग्छ तर हिउँ हेर्दा जति रमाइलो लाग्छ वास्तवमै हिमाल चढ्न बडो मुस्किल हुन्छ । धेरै दुःख हुन्छ । जोखिम पनि हुन्छ । अझ आरोहण गर्नका लागि नियम हुन्छन् । हिमाल चढ्दा जति माथि गयो त्यत्ति नै कठिन हुन्छ । अक्सिजनको कमीले सास फेर्न कठिन हुन्छ । चिसो बढ्दै जाँदा स्वास्थ्यमा विभिन्न समस्या पनि देखिन्छन् । हिमाल चढेर फर्किंदा पनि उत्तिकै जोखिम हुन्छ । फर्किने क्रममा चिप्लिएर धेरैले ज्यान गुमाएका पनि छन् ।

उहाँले सबैभन्दा बढी पटक सगरमाथा चढ्ने आफ्नै कीर्तिमान नौ पटक तोडेर र आठ हजारभन्दा अग्ला हिमाल पाँच पटक चढेर गिनिज बुकमा १४ वटा रेकर्ड राख्नुभएको छ ।

उहाँले ३० पटक सगरमाथा, आठ पटक चोयु, चार पटक मनासलु, एक पटक ल्होसे र एक पटक केटु गरेर आठ हजारभन्दा अग्ला हिमाल ४४ पटक आरोहण गर्नुभएको छ । उहाँले २१ मे २०१९, ७ मे २०२१, ७ मे २०२२, १२ मे २०२४ र २२ मे २०२४ मा आठ हजारभन्दा बढी उचाइका हिमाल आरोहण गरी गिनिज बुकमा नाम लेखाउन सफल हुनुभएको थियो । हिमाल चढेर आफ्नो नामसँगै देशको नाम विश्वलाई चिनाउन पाउँदा उहाँ खुसी हुनुहुन्छ ।

सगरमाथा आरोहणमा बनेका कीर्तिमान