नेपालगन्ज समाचारदाता
नेपालगन्ज, फागुन २३ गते । गत केही समययता बाँके जिल्लामा नदीजन्य पदार्थको अवैध दोहन र ओसारपसार बढेको पाइएको छ । बाँकेको डुडुवा गाउँपालिकामा पर्ने राप्ती नदीको सिधनियाघाटछेउबाट ठुलो परिमाणमा नदीजन्य पदार्थ ढुङ्गा, बालुवा र गिट्टीको अवैध दोहन र ओसारपसार दैनिक जसो भइरहेको स्थानीयले बताएका छन् । स्थानीयले नदीजन्य पदार्थको अवैध ओसारपसार बढेको गुनासो गरिरहेकै बेला प्रहरीले अवैध रूपमा नदीजन्य पदार्थ ओसारपसार गर्ने पाँच वटा टिप्परलाई एकै दिन नियन्त्रणमा लिएको छ ।
प्रहरीले डुडुवा गाउँपालिका–५ स्थित मिलन चोकबाट अवैध रूपले नदीजन्य पदार्थ लोड गरेर आउँदै गरेका भे १ क १८१६ र भे १ क १८६१ नम्बरका टिप्परलाई बुधबार बिहान र भे १ क २२६३, २२८९ र १६७५ नम्बरका टिप्परलाई बुधबार राति नियन्त्रणमा लिएको जिल्ला प्रहरी कार्यालय बाँकेका प्रवक्ता प्रहरी नायब उपरीक्षक दीपक पातलीले बताउनुभयो । उहाँले नदीजन्य पदार्थको अवैध रूपमा ओसारपसार भइरहेको बारेमा स्थानीयले सूचना दिएपछि प्रहरीले कम्दी क्षेत्रमा पुगेर बिहान र राति गरेर एकै दिन नदीजन्य पदार्थ बालुवा र गिट्टी लोड गरेका पाँच वटा टिप्परलाई नियन्त्रणमा लिएर थप अनुसन्धान गरिरहेको बताउनुभयो ।
नियन्त्रणमा लिइएका टिप्परमध्ये भे १ क १८६१ नम्बरको टिप्परमा बाबा स्टोन क्रसर लेखिएको जनाउँदै सो टिप्पर र अरू टिप्पर कसका हुन ? कहिलेदेखि यस कार्यमा लगाइएको थियो सोबारे पनि अनुसन्धान भइरहेको प्रहरीले जनाएको छ ।
राति नियन्त्रणमा लिइएका तीन वटा टिप्पर स्थानीयले रोकेर सोधपुछ गरी प्रहरीलाई बोलाएर जिम्मा लगाएको पनि प्रहरीले जनाएको छ । राति टिप्परचालक, स्थानीय र गाउँपालिकाका कर्मचारीबिच विवाद भइरहेका बेला आफूहरू पुगेर तीन वटा गाडी नियन्त्रणमा लिइएको इलाका प्रहरी कार्यालय कम्दीका इन्चार्ज मोहन केसीले बताउनुभयो । नियन्त्रणमा लिएका टिप्परलाई राजस्व अनुसन्धान कार्यालय कोहलपुरमा बुझाइएको र थप कारबाही सोही निकायबाट हुने प्रहरीले जनाएको छ । बाँकेका विभिन्न खोला र नदीबाट नदीजन्य पदार्थको अवैध उत्खनन, ओसारपसार र बिव्रmी गर्ने कार्य लामो समयदेखि हुँदै आएको र सो रोक्न सम्बन्धित निकायले निकै कम चासो लिने गरेको स्थानीयको गुनासो छ ।
