जेरेसलम, पुस १४ गते । इजरायलले दक्षिणी क्षेत्रमा रहेको आशालिम ऊर्जा स्टेशनमा ब्याट्रीसहितको नयाँ सौर्य ऊर्जा केन्द्र निर्माण गर्ने भएको छ । यो केन्द्र राष्ट्रिय विद्युत क्षेत्रमा करिब ८० मेगावाट विद्युत आपूर्ति गर्न सक्षम हुने छ भने जडित सौर्य प्यानलको क्षमता १५० मेगावाट रहेको छ ।
साथै, केन्द्रमा करिब ४०० मेगावाट-घण्टा विद्युत सञ्चयन गर्न सक्ने ब्याट्री प्रणाली स्थापना गरिने छ, जसले दिनको समयमा उत्पादित विद्युत राति वा विद्युत माग उच्च हुने समयमा प्रयोग गर्न सजिलो बनाउने छ । सरकारले सन् २०३० सम्म देशको ३० प्रतिशत विद्युत आवश्यकताका लागि नवीकरणीय ऊर्जा स्रोत प्रयोग गर्ने लक्ष्य राखेको छ ।
यस परियोजनाले प्रदूषण कम गर्ने र स्वच्छ ऊर्जा प्रवद्र्धन गर्नेमा महत्वपूर्ण योगदान पुर्याउने विश्वास गरिएको छ । परियोजना पूरा भएपछि आशालिम क्षेत्रमा कार्यान्वयन हुने नवीकरणीय ऊर्जा परियोजनाले इजरायलको विद्युत क्षेत्रमा ८०० मेगावाटभन्दा बढी विद्युत आपूर्ति गर्ने अपेक्षा गरिएको छ । रासस/सिन्ह्वा
-original-thumb.jpg)
