हरिकृष्ण ऐडी
हरिकृष्ण ऐडी
मुगु, जेठ १६ गते । मुगु जिल्लाको छायाँनाथ रारा नगरपालिकाका नवनिर्वाचित नगरप्रमुख विष्णुकुमार भामले नगरको फोहोर व्यवस्थापनका लागि अभियान सुरु गर्नुभएको छ । नगरप्रमुख भामले घरदैलो अभियान चलाएर जथाभावी फोहोर नफाल्न आग्रह गर्नुभएको हो । उहाँले सरसफाइलाई व्यवस्थापन गर्नका लागि गमगढी बजारको घरदैलोमा पुग्नुभएको हो ।
नगरप्रमुख भामले पदभार ग्रहणलगतै गमगढी बजारमा जथाभावी ढलनिकासिले दुर्गन्धित भएको भन्दै सफा सुन्दर गमगढी बजारको अभियान थाल्नुभएको हो । स्थानीयको घरदैलोमा पुगेर नगर प्रमुख भामले बजारलाई सफा राख्न र फोहोर नगर्न भन्दै जिल्लाको मुटु सदरमुकाम भएकाले जथाभावी फोहोर नगर्न आग्रह गर्नुभएको हो।
नगरप्रमुख आफैँ सरसफाइमा जुटेपछि सरसफाइ सहजकर्ता सहयोगी र बजारवासीले पनि उहाँलाई साथ दिएका थिए । नगरप्रमुख भामले फोहोर एकै ठाउँमा व्यवस्थापन गर्दा फोहोर नहुने र नगरको गाडीले फोहाेर आफैँ उठाई डम्पिङ साइडमा फोहर व्यवस्थापन गर्ने भएकाले यसमा बजारबासीको सहयोग रहनुपर्ने बताउनुभयो । साथै उहाँले नियमित राम्रोसँग सरसफाइ गर्न नगरका कर्मचारी सरसफाइमा खटिने सहजकर्तालाई पनि निर्देशन दिनुभएको थियो ।
