गोरखापत्र अनलाइन
काठमाडौं, पुस २० गते । नेवारहरूको राष्ट्रिय संगठन नेवा देय् दबूको काठमाडौं महानगर समितिको अध्यक्षमा अर्बिन्द्रमान सिंह सर्वसम्मत निर्वाचित हुनुभएको छ । आज भएको दोश्रो अधिवेशनबाट उहाँलाई अध्यक्षमा निर्वाचित गरेको हो ।
त्यसैगरी वरिष्ठ उपाध्यक्षमा उदेन न्हुसाय्मी, उपाध्यक्ष द्वयमा सुलोचना मानन्धर तथा शैलेस डंगोल, सचिवमा मन्जिल महर्जन तथा निरु महर्जन र कोषाध्यक्षमा रोशन महर्जन सर्वसम्मत निर्वाचित हुनुभएको छ ।
नेवाः देय् दबूका केन्द्रिय अध्यक्ष पवित्र बज्राचार्यको प्रमुख आतिथ्यमा भएको साँस्कृतिक झाँकीले नगर परिक्रमा गरी सभा हलमा पुगेर खुल्लासत्र तथा बन्दसत्र सम्पन्न भएको थियो । निर्वाचित भए पश्चात वक्तव्य राख्ने नवनिर्वाचित अध्यक्षले आफनो कामलाई बिना स्वार्थ निरन्तरता दिइ अनुशासित भएर लागेको खण्डमा लक्ष्य प्राप्ति गर्न सजिलो हुने बताउनुभयो । कार्यक्रममा विभिन्न खलः पुचका अध्यक्ष र केन्द्रिय समितिका पदाधिकारीहरुको उपस्थिति रहेको थियो ।
