पेरिस, असार २४ गते । फ्रान्सको संसदीय चुनावमा वामपन्थीहरूले अग्रता लिइरहेको प्रारम्भिक मतगणनाले देखाएको छ ।सबै अपेक्षा विपरीतपेरिसमा वामपन्थी कार्यकर्ताहरूको ठुलो भीड भेला भई मतगणनाको अन्तिम परिणामको पर्खाइमा रहेको छ ।
प्रारम्भिक अनुमानअनुसार वाम गठबन्धनले १७७ देखि १९८ सिट अग्रता लिएको छ भने राष्ट्रपति इमानुएल म्याक्रोँको मध्यमार्गी गठबन्धन १५२ देखि १६९ सिट र आरएनको १३५ देखि १४५ सिटमा अगाडि छ ।
राजधानीको स्टालिनग्राद स्क्वायरमा वामपन्थी फ्रान्स अनबोड (एलएफआई) पार्टीको भेलामा सहभागी दर्शनशास्त्रकी छात्रा मेरी डेलिलले भन्नुभयो, “म साँच्चै खुसी छु, यहाँ अकल्पनीय ऊर्जा मिलेको छ र मेरो मन चिसो भइरहेको छ ।”
“प्रारम्भिक नतिजा राम्रो भएको महसुस भइरहेको छ तर हामी अझै पनि अन्तिम नतिजाको पर्खाइमा छौँ,” उहाँले भन्नुभयो ।
धेरै फ्रान्सेली मतदाताहरूले आप्रवासन विरोधी, युरोपेली सङ्घप्रति आलोचनात्मक धारणा राख्ने (युरोसेप्टिक) नेशनल र्याली (आरएन) पार्टीले संसद्को सबैभन्दा ठुलो भाग कब्जा गर्ने डर व्यक्त गरेका थिए ।
यातायात क्षेत्रमा काम गर्ने एलएफआईका कार्यकर्ता दलिल डियाबले भन्नुभयो, “हामी राहत महसुस गरिरहेका छौँ । वामपन्थी गठबन्धनको जीत र फ्रान्सको भविष्यको लागि धेरै आशा पलाएको छ ।”
इतिहासका विद्यार्थी ह्युगो चेभ्याली आरएनले प्राप्त गरेको सिटको ठुलो हिस्सालाई सङ्केत गर्दै र आफ्नो उत्साहलाई व्यक्त गर्दै भन्नुभयो, “यो एक जीत हो, तर यो सापेक्ष विजय हो ।”
हामीले निरन्तर सङ्घर्ष जारी राख्नुपर्छ । यो समाप्त भएको छैन । तर यो नतिजाले अलिकति राहत मिलेको छ । केही दिन पहिलेसम्म हामीले यस्तो अपेक्षा गरेका थिएनौँ ।
वामपन्थी न्यु पपुलर फ्रन्टका सयौँ समर्थकहरू पनि राजधानीको रिपब्लिक स्क्वायरमा उत्सव मनाउन भेला भएका थिए ।
“हामीले जितेका छौँ । यो हाम्रो जीत हो,” भीडका सदस्यहरूले निलो, सेतो र रातो फ्रान्सको झण्डा बोकेर ‘फ्रान्स आप्रवासनबाट विकसित भएको हो’ लेखिएको नारा लगाएका थिए ।
एक सहभागीले बोकेका प्लेकार्डमा वामपन्थीको बहुमतलाई सङ्केत गर्दै लेखिएको थियो, “यो जीत आरएनको होइन, म्याक्रोँको पनि होइन ।”
गत जुन ९ मा भएको युरोपेली चुनावमा आरएनले आफ्नो मध्यमार्गी गठबन्धनलाई पराजित गरेपछि म्याक्रोँले निर्वाचन घोषणा गर्दै राजनीतिक जोखिम मोल्नुभएको थियो ।
तीन पटक राष्ट्रपति पदका उम्मेदवार बनेका मारिन ले पेनले आफ्नो आरएन पार्टीले राष्ट्रिय चुनावमा पूर्ण बहुमत हासिल गर्ने र सरकार समेत बनाउने आशा व्यक्त गर्नुभएको थियो, तर अधिकांश जिल्लामा आरएन विरोधी एक जना मात्र उम्मेदवार भएको सुनिश्चित गर्न वाम र केन्द्र एकसाथ भेला भएपछि त्यो सपना चकनाचुर भयो ।
पेरिसको अर्को एक चोकमा आरएनको लागि वातावरण निराशपूर्ण देखिन्थ्यो । त्यहाँ भेला भएका आफ्ना समर्थकलाई सम्बोधन गर्दै नेता जोर्डन बर्डेलाले राष्ट्रपतिको पार्टीलाई ‘निर्वाचन प्रणालीलाई’ गलहत्त्याएर अपवित्र गठबन्धन गरेको आरोप लगाउनुभयो ।
आरएन समर्थकको आक्रोश
समूहमा रहेका ६४ वर्षीया नर्स ओलिभर मोन्डेट यति धेरै मानिसहरूले अति दक्षिणपन्थी समूह (आरएन) को विरुद्धमा मतदान गरेपछि आक्रोश पोख्दै भन्नुभयो, “उनीहरूले फ्रान्सेली जनतालाई पुरानो कुरा लुकाएका छन् तिनीहरूले यो सबै बिर्सिएका छन् ।
त्यसैगरी, ३२ वर्षीया सेसिलिया जेन्नाडले परिणामबाट आफू निराश भएको बताउनुभयो । उहाँले भन्नुभयो, “मानिसहरूले वर्षौँदेखि आरएनलाई खलनायकको रूपमा प्रस्तुत गर्दै आएका छन् । आगामी दिनमा वामपन्थी ‘अतिवादी’ ले जनताको डरमाथि खेल्नेछ ।” तर अब आफ्नो ध्यान सन् २०२६ मा हुने स्थानीय तहको निर्वाचनको प्रतीक्षामा हुने उहाँले बताउनुभयो । हामी हार मान्ने छैनौँ । निरन्तर देश र राष्ट्रियताको लागि सङ्घर्ष गर्नेछौ ।”
कार्यक्रमका लागि सुट र टाईमा सजिएका युवा पार्टी अनुयायीहरूमध्ये इतिहासका विद्यार्थी नोआ लुडोन पनि यो निर्वाचनमा जे भए पनि नतिजा राम्रो हुनेमा आशावादी देखिनुहुन्थ्यो । उहाँले भन्नुभयो, “आरएन एक उच्च गतिको रेल हो । हाम्रा मतदाता बढ्दै गएका छन् । अगामी दिनमा विजय सुनिश्चित छ ।” रासस/एएफपी
