बिन्दु थापा
तानसेन, वैशाख २७ गते । बालबालिकालाई असल संस्कार सिकाउने उद्देश्यले देववाणी संस्कृत तथा साधारण माध्यमिक विद्यालय पाल्पामा आमाको मुख हेर्ने दिनमा आमा सम्मान कार्यक्रम सम्पन्न गरेको छ । आमाको महत्व र संंस्कारलाई संरक्षण गर्ने उद्देश्यले कार्यक्रमको आयोजना गरिएको हो ।
विद्यालयका प्राधानाध्यापक कृष्णबहादुर थापाले असल मानव बनाउन असल संस्कारको आवश्यकता रहेको भन्दै असल शिक्षाले नै मानिसलाई खुसी राख्न मद्दत पुग्ने बताउनुभयो ।
थापाले पछिल्लो समयमा आफ्ना स्वार्थका लागि मात्र सोच्ने आमा बाबुप्रतिको जिम्मेवारी बोध नहुने हुँदा आमा सम्मान कार्यक्रमले बच्चालाई आमाको मोह र आमाले बिताएका कठिन परिस्थिति बारेमा ज्ञान दिन कार्यक्रमको आयोजना गरिएको बताउनुभयो । थापाले आमाको महत्व नबुझे जीवनमा कहिल्यै सफल हुन नसक्ने भन्दै आमाको खुसीमा आफ्नो खुसी देख्ने व्यक्ति नै संसारको सफल र सुखी व्यक्ति बन्ने बताउनुभयो ।
विद्यालय व्यवस्थापन समितिका अध्यक्ष उमा अर्यालले संस्कार कुनै उमेर समूह र समयका लागि मात्र नभएर सबै र सधैँका लागि अत्यावश्यक रहेको भन्दै कार्यक्रममा सहभागी भएका आमाहरु र विद्यार्थीलाई आमा सम्मान कार्यक्रमबाट सबैले फाइदा लिनुपर्नेमा जोड दिनुभयो ।
अर्यालले बालबालिकाको पहिलो पाठशाला भनेकै आफ्नो घर र त्यसपछि विद्यालय भएकाले संस्कार घरबाट पनि सुरु गराउनुपर्नेमा जोड दिनुभयो । अभिभावक गीता खनालले आधुनिक शिक्षा प्रणालीले कुनै पनि व्यक्तिलाई पेशागत सफलतामा पुर्याए पनि सुसंस्कार सिकाउन नसक्दा मानवीय मूल्य–मान्यताहरु नै सङ्कटग्रस्त बन्दै गएकोमा यसरी कार्यक्रम राखिनु सकारात्मक भएको बताउनुभयो ।
सहभागी अभिभावकले आफ्ना छोराछोरीलाई सानै उमेरदेखि असल संस्कार दिलाउन आवश्यक रहेको र त्यसका लागि संस्कार विद्यालयले महत्वपूर्ण भूमिका निर्वाह गर्ने र यस्ता संस्कारि ज्ञानले हृदयलाई प्रशिक्षित गर्ने बताएका थिए ।
