आयोगको सिफारिस कार्यान्वयन कमजोर
नेपालमा मानव अधिकार उल्लङ्घनकर्तामाथि कारबाहीमा सरकार कमजोर देखिएको बताइएको छ । गत आर्थिक वर्ष २०७८÷७९ मा राष्ट्रिय मानव अधिकार आयोगले मानव अधिकार उल्लङ्घन गर्नेमाथि कारबाही गर्न सरकारलाई गरेको सिफारिसको अनुपातमा सरकारले कम सङ्ख्यामा कारबाही गरेको पाइएको छ ।
गाउँपालिकाले अस्पताल सञ्चालन गर्दै
चितवनको इच्छाकामना गाउँपालिकामा आगामी पुसको पहिलो साताबाट अस्पताल सञ्चालनमा आउने भएको छ। गाउँपालिकामा रहेको स्वास्थ्य चौकीलाई स्तरोन्नति गरी १५ शय्याको अस्पताल सञ्चालन गर्न लागिएको हो। अस्पताल सञ्चालनका लागि अहिले उपकरण जडान, उपचार कक्षहरू तयारी गर्नेलगायतका काम भइरहेको गाउँपालिका अध्यक्ष दानबहादुर गुरुङले जानकारी दिनुभयो।
योजनाको सम्झौता गर्न तीन दिन हिँड्नु पर्ने लिमीवासीको बाध्यता
नाम्खा गाउँपालिका – ६ को हिमालपारिको गाउँ लिमीका स्थानीयलाई तीन दिन पैदल हिँडेर योजना सम्झौता गर्नु पर्ने बाध्यता रहेको छ । गाउँपालिकाले लिमीका लागि विकासे योजनाहरूको काम अगाडी बढाउन सम्झौताका लागि सूचना सार्वजनिक गरेपछि लिमीबाट सदरमुकाम सिमकोट तीन दिन पैदल हिँडेर आउनु परेको हो ।
‘प्रमुख दलकै कमजोरीले नयाँ शक्तिको उदय’
नेपाली कांग्रेसका वरिष्ठ नेता रामचन्द्र पौडेलले प्रमुख दलहरूकै कमजोरीका कारण स्वतन्त्र पार्टीलगायतका नयाँ शक्तिहरूको उदय भएको बताउनुभएको छ। नेपाल प्रेस युनियन चितवनले बिहीबार भरतपुरमा आयोजना गरेको पत्रकार सम्मेलनमा बोल्दै नयाँ शक्तिको उदयलाई आफूले गम्भीर रूपमा लिएको धारणा राख्नुभयो।
बालविवाहमा सहभागी नहुने प्रतिबद्धता
उमेर नपुगी भएको विवाह भोजमा सार्वजनिक पद धारण गर्ने व्यक्ति सहभागी नहुने भएका छन् । बढ्दो बालविवाह न्यूनीकरण गर्ने उद्देश्यले परिवारबाट निमन्त्रणा भएको भोज तथा विवाहको अन्य कार्यमा सार्वजनिक पद धारण गर्ने व्यक्ति सहभागी नहुने भएका हुन् । बालविवाह न्यूनीकरण नभएको भन्दै यहाँका सरोकारवाला पक्षले गाउँमा कसैको बालविवाह भएको भए, त्यस्ता स्थानमा आयोजना भएको कुनै पनि कार्यक्रममा सरिक नहुने प्रतिबद्धता जनाएका छन् ।
सडकको धुलोले सास्ती
सर्लाहीका विभिन्न भित्री सडकमा धुलोका कारण सर्वसाधारण हैरान भएका छन्। जिल्लाको पूर्व–पश्चिम हुलाकी राजमार्गसहित अन्य भित्री सडकहरूमा अहिले असाध्य धुलो उड्ने गरेको छ। जसले गर्दा स्थानीयलाई आवतजावत गर्न निकै समस्या भइरहेको छ भने धुलोकै कारण उनीहरू बिरामी पर्न थालेका छन्।
मुख्यमन्त्रीको चर्चा सुरु आकाङ्क्षी धेरै
मधेश प्रदेश सभा सदस्यको प्रत्यक्षतर्फको मतगणना सकिएलगत्तै सरकार नेतृत्वको चर्चा चल्न थालेको छ। मधेश सरकार कुन दल र कसको नेतृत्वमा बन्ने कुरा चिया पसलदेखि दुई/चार जनाको जम्काभेटमा समेत चल्ने गरेको छ। मधेश प्रदेश प्रत्यक्षतर्फको मतगणनाअनुसार सत्ता गठबन्धनले सामान्य बहुमत प्राप्त गरेको छ तर दलको हिसाबमा नेपाल कम्युनिस्ट पार्टी (एमाले) पहिलो र नेपाली कांग्रेस दोस्रो दल बनेका छन्। समानुपातिकको मत गन्न बाँकी नै छ। समानुपातिक मत परिणामको आधारमा पाउने सङ्ख्या यकिन भइसकेपछि मात्र पहिलो दल छुट्याउन सकिन्छ।
भगवतीको प्राथमिकता विपन्न समुदायको उत्थान
संसद् प्रवेशका लागि भएको चुनावी प्रतिस्पर्धामा तेस्रो पटकमा सफलता प्राप्त गर्नुभएकी प्रतिनिधि सभाका नवनिर्वाचित सदस्य भगवती चौधरीले आफूले कृषिलाई व्यवसायिक र निर्यातमुखी बनाउन प्रयास गर्ने बताउनुभएको छ। सुनसरी क्षेत्र नम्बर ३ बाट नेपाली कांग्रेसका नेता तथा पूर्वउपप्रधानमन्त्री विजयकुमार गच्छदारलाई तेस्रो पटकमा पराजित गर्दै सांसद बन्नुभएकी नेकपा एमालेकी नेत्री चौधरीले महिलालाई आत्मनिर्भर, स्वरोजगार बनाउने अभियानमा आफ्नो प्राथमिकता रहने बताउनुभएको छ।
दृष्टिविहीन दम्पतीलाई घर चलाउनै गाह्रो
मोरङको कानेपोखरी–६, सुन्तली गाउँका पूर्ण दृष्टिविहीन सुब्बा दम्पतीले राज्यबाट अपहेलित भएको गुनासो गर्नुभएको छ। दुवै जना पूर्ण दृष्टिविहीन भए पनि सरकारले अपाङ्गताको रातो परिचयपत्र नदिएको उहाँहरूको भनाइ छ। पूर्ण दृष्टिविहीनलाई सरकारले पूर्ण अपाङ्गता भएको मान्दैन। अर्काको सहारामा हिँड्ने र खानेलाई मात्र रातो परिचयपत्र दिने र त्यस्ता व्यक्तिलाई मासिक चार हजार रुपियाँ दिने कानुनी व्यवस्था छ। दृष्टिविहीन सागरराज सुब्बा तीन वर्षअघिसम्म सरकारी विद्यालयमा पढाउनुहुन्थ्यो। धरानको शहीद स्मृति माविमा २२ वर्ष पढाउनुभयो तर पनि उहाँ स्थायी हुन सक्नुभएन। त्यसपछि ‘गोल्डेन हेन्डसेक’ लिएर जागिरबाट अवकाश लिनुभएका सुब्बा यतिबेलाको दैनिकी कष्टपूर्ण भएको बताउनुहुन्छ। सरकारले दिएको छ लाख ६७ हजार रुपियाँ उहाँले घरखेत जोड्नमा खर्चिनुभयो। घरखेत जोड्नुभयो तर जागिर छैन।