नेतृत्वका लागि दौडधुप



मकवानपुर समाचारदाता

हेटौँडा, साउन २५ गते । तत्कालीन नेकपा एमाले र तत्कालीन नेकपा माओवादी केन्द्र गत जेठ महिनामा एकीकृत भएपछि नेतृत्वविहीन बनेको नेपाल कम्युनिस्ट पार्टी (नेकपा) मकवानपुरमा नयाँ नेतृत्वको खोजी हुन थालेको छ । तत्कालीन नेकपा एमाले र तत्कालीन नेकपा माओवादी केन्द्रभित्र नेतृत्व चयनका लागि रस्साकस्सी सुरु भएको छ ।
तत्कालीन नेकपा एमाले र तत्कालीन नेकपा माओवादी एक भए पनि मूल नेतृत्व दुवै पक्षले पाउनुपर्ने दाबी गरिरहेका छन् । १४५ सदस्यीय बन्ने जिल्ला समितिमा तत्कालीन माओवादी पक्षलाई ६५ सदस्यमात्र दिने भएपछि असन्तुष्टि जनाएका छन् ।
तत्कालीन माओवादीका एक नेताले जिल्ला समितिमा ६५ जनामात्र दिनु सम्मानजनक नरहेकोले आफूहरूको विमति रहेको बताउँदै सङ्ख्या यकिन भएपछि नेतृत्वबारे छलफल हुने जानकारी दिनुभयो ।
यसैबीच तत्कालीन एमालेको सचिवालय परामर्श समितिको बिहीबार हेटौँडामा बैठक सम्पन्न भएको छ । नेकपा मकवानपुरको अध्यक्ष तत्कालीन एमालेलाई र सचिव तत्कालीन माओवादी केन्द्रलाई दिने सहमति भएको भन्दै अध्यक्ष छनोटको लागि भएको बैठकले चार जनाको नाम प्रदेशको कार्यदलमा सिफारिस गर्ने निर्णय गरेको छ ।
बैठकले तत्कालीन एमालेका जिल्ला अध्यक्ष एवम् प्रदेशसभा सदस्य मुनु सिग्देल, उपाध्यक्ष बद्री लम्साल, सचिव एकालाल श्रेष्ठ र पूर्व जिल्ला सचिव श्रीधर पोखरेलको नाम सिफारिस गर्ने निर्णय गरेको छ ।
तर, बिहीबार नै काठमाडौँमा बसेको नेकपाको पार्टी सचिवालय बैठकले प्रदेशसभा सदस्य जिल्ला पदाधिकारी नपाउने निर्णय गरेकोले प्रदेशसभा सदस्य बाहेक तीन जनाको मात्र नाम सिफारिस हुने लम्सालले जानकारी दिनुभयो ।

 

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds