विजयकुमार साह
ढल्केबर, पुस १८ गते । बाक्लो हुस्सु र शीतलहरका कारण धनुषालगायत तराई मधेशको जनजीवन कष्टकर बनेको छ । आज (सोमबार) बिहानैदेखि यहाँ बाक्लो हुस्सु लागेको छ । बाक्लो हुस्सु र शीतलहरसँगै चलेको चिसो हावाका कारण सर्वसाधारण अत्यधिक चिसो महसुस गरिरहेका छन् ।
धनुषालगायतका क्षेत्रमा हिजो (आइतबार)सम्म बिहान बेलुका कुहिरो र चिसो लाग्ने र दिउँसो पारिलो घाम लाग्ने गरेको भए पनि आज बिहानदेखि बाक्लो हुस्सु र चिसो बढेको छ ।बाक्लो हुस्सु र शीतलहर बढेपछि बालबालिका, जेष्ठ नागरिक, सुत्केरी, गर्भवती, विपन्न, सडक र हवाई यातायात प्रभावित भएका छन् । विपन्न परिवार आगो तापेर तथा परालको भरमा चिसो काट्न बाध्य छन् । परालकै आगो ताप्ने र परालकै ओछ्यान बनाएर चिसोबाट जोगिने प्रयास गरिरहेका छन् ।
गणेशमान चारनाथ नगरपालिका–५ का जगदीश पासवानले चिसोबाट बच्न आगो ताप्नुबाहेक अरु उपाय नभएको बताउनुभयो । घरमा न्यानो लुगा नभएको बताउँदै उहाँले जाडोका कारण दैनिकी कष्टकर बनेको जानकारी दिनुभयो ।
जिल्लाको मिथिला नगरपालिका र जनकपुरधाम उपमहानगरपालिकाले भने सर्वसाधारण तथा बटुवालाई आगो ताप्ने व्यवस्था मिलाएका छन् । यी दुबै स्थानीय तहले विपन्न बस्तीमा दाउरा वितरण तथा चोक–चोकमा आगो बालेका छन् ।
यस्तै, बाक्लो हुस्सु र शीतलहरका कारण सडक तथा हवाई यातायातसमेत प्रभावित भएका छन् । अन्य दिन बाक्लो चाप देखिने पूर्व–पश्चिम राजमार्गमा छिटपुट सवारीसाधन गुडेका छन् ।
ट्रकचालक रामाशङ्कर महतोले बाक्लो हुस्सुका कारण सवारी गुडाउन समस्या भइरहेको बताउनुभयो । मुस्किलले २० मिटरको दूरीसम्म राम्ररी देखिने गरेको बताउँदै उहाँले सुरक्षाका निम्ति बत्ती बालेर गाडी गुडाउने गरेको जानकारी दिनुभयो ।
बाक्लो हुस्सु र चिसो बढे पनि धनुषाको सामुदायिक तथा संस्थागत विद्यालयले सुचारु रहेको छ । मौसम विज्ञहरुले तराई मधेशलगायत देशको अधिकांश स्थानमा बाक्लो हुस्सु र शीतलहर बढ्ने सम्भावना रहेको भन्दै आवश्यक सावधानी अपनाउन आग्रह गरेका छन् ।
