ठक्करबाट घाइते भएका राजवंशीको मृत्यु

विष्णुप्रसाद पोखरेल

दमक, फागुन ७ गते । झापाको हल्दिवारीमा ट्रयाक्टरको ठक्करबाट गम्भीर घाइते हुनु भएका व्यक्तिको उपचारको क्रममा मृत्यु भएको छ । शनिबार हल्दिवारी–२ रामलाल चौकमा नम्बर नखुलेको ट्रयाक्टरले विपरीत दिशाबाट आउँदैगरेको ना. १७ प. १०३४ नम्बरको मोटरसाइकललाई ठक्कर दिँदा दुर्घटना भएको थियो ।

प्रहरीका अनुसार दुर्घटनामा मोटरसाइकल चालक स्थानीय ४२ वर्षीय दिनेश राजवंशी गम्भीर घाइते भएपछि उपचारका लागि ओमसाइ पाथिभरा अस्पताल लगिएको थियो । उपचार हुन नसकेपछि प्रादेशिक अस्पताल भद्रपुर लगिएको थियो । उपचारको क्रममा सोमबार दिउँसो राजवंशीको मृत्यु भएको जिल्ला प्रहरी कार्यालय झापाका प्रहरी निरीक्षक ढुण्डिराज गिरीले जानकारी दिनुभयो । 

घटनाबारे अनुसन्धान सुरु गरिएको गिरीले जानकारी दिनुभयो । को १ त ५०४६ न. को ट्रयाक्टरले ठक्कर दिएको अनुसन्धानबाट खुलेको गिरीले बताउनुभयो । ट्याक्टरसहित ट्याक्टर चालकलाई नियन्त्रणमा लिइसकिएको जिल्ला प्रहरी कार्यालय झापाले जनाएको छ ।