गोदावरी (कैलाली), माघ २१ गते । धनगढी उपमहानगरपालिका बजार क्षेत्रका वडाबाट दैनिक २० देखि २५ टनसम्म फोहाेर सङ्कलन हुँदै आएको छ । सङ्कलित कुहिने फोेहाेरबाट मल तथा बायो ग्यास उत्पादन हुँदै आएकामा नकुहिने फोहाेर सूक्ष्म वर्गीकरण गरेर बिक्री गरिने भएको हो ।
झुरा कागज, कपी, कार्टुन, गत्ता, प्लास्टिक, बोतल, प्लास्टिकका गुडिया, सिसा, आल्मुनियम, टायर र ट्युबलगायत नकुहिने फोहाेर सङ्कलन गरी बिक्री गरिने उपमहानगरपालिकाले जनाएको छ ।
नगरले बजार क्षेत्रका नौवटा वडाबाट सङ्कलन गरिएको फोहर सूक्ष्म वर्गीकरण गरेर बिक्रीका लागि तयार गरेको सरसफाइ व्यवस्थापन शाखा प्रमुख अशोक अवस्थीले बताउनुभयो । धनगढी–२ मा एक बिघा जग्गा वार्षिक रु ८८ हजार आठ सय ८८ मा भायामा लिएर सूक्ष्म वर्गीकरण केन्द्र स्थापना गरिएको उहाँले जानकारी दिनुभयो ।
सो वर्गीकरण केन्द्रमा रु. १९ लाखका उपकरण तथा संरचना निर्माण गर्नुका साथै रु सात लाखको घेरबारसमेत गरिएको जनाइएको छ । अवस्थीका अनुसार उपकरणका लागि आवश्यक विद्युत् जडान गरेर दुई जना प्राविधिकसहित १२ जनाले गत वैशाखदेखि उक्त केन्द्र सञ्चालनमा ल्याएका छन् । केन्द्रले रु १३ लाख ५१ हजारमा नकुहिने फोहाेर बिक्रीका लागि तयार गरी बोलपत्र आह्वान गरिसकेको उहाँले जानकारी दिनुभयो ।
उपमहानगरपालिकाका सरसफाइ व्यवस्थापन शाखा प्रमुख अवस्थीले पहिलो पटक फोहाेर बिक्रीबाट रु. १३ लाख ५१ हजार आम्दानी हुने बताउनुभयो । उहाँका अनुसार वर्गीकृत फोहाेरलाई बिक्री गर्ने प्रक्रिया अगाडि बढेको छ ।
विगतका वर्षमा उपमहानगरले बजार क्षेत्रबाट सङ्कलन भएको फोहाेर नदी किनार तथा जङ्गल क्षेत्रमा थुपार्दै आएकामा पहिलो पटक सूक्ष्म वर्गीकरण केन्द्र सञ्चालनमा ल्याएर आम्दानी गर्ने भएको हो ।
उक्त आम्दानीबाट केन्द्रका कर्मचारी, विद्युत् शुल्क, फोहाेर सङ्कलन गर्ने कर्मचारी तथा गाडीमा लाग्ने इन्धनको खर्चको व्यवस्थापन गर्ने उपमहानगरपालिकाको योजना छ । रासस
