रमेश विश्वकर्मा
गुल्मी, माघ २० गते । गुल्मीमा झण्डै छ हजार किशोरीको रक्तअल्पता परीक्षण गरिने भएको छ । स्वास्थ्य कार्यालय गुल्मीले माघ अन्तिम साताबाट यस जिल्लाका सामुदायिक विद्यालयमा अध्ययनरत करिब पाँच हजार नौ जना किशोरीको रुक्तअल्पता परीक्षण गर्ने भएको हो ।
जिल्लामा आर्थिक वर्ष २०७७/०७८ देखि १०/१९ वर्ष उमेर समूहका किशोरीहरूलाई आइरन र फोलिक एसिड खुवाउँदै आइएको छ । जिल्लाका १२ वटै स्थानीय तहमा रहेका विद्यालयमा अध्ययनरत किशोरीहरूलाई वर्षको दुई पटक १३/१३ हप्ताको फरकमा आइरन र फोलिक एसिड खुवाउँदै आइरहेको स्वास्थ्य कार्यालय गुल्मीका परिवार नियोजन सुपरभाइजर गोपाल बहादुर कार्कीले जानकारी दिनुभयो ।
यसरी आइरन र फोलिक एसिड सेवन गरिरहेका किशोरीहरूको रक्तअल्पताको अवस्था के कस्तो रह्यो ? भनेर परिणाम हेर्नका लागि प्रत्येक पालिकाको दुई वटा माध्यमिक विद्यालयमा रक्तअल्पताको परीक्षण गर्न लागिएको हो । तम्घासमा जिल्लाका १२ वटै स्थानीय तहका स्वास्थ्य शाखा प्रमुख र शिक्षा शाखा प्रमुखहरूलाई किशोरीहरूको रक्तअल्पता परीक्षण तथा व्यवस्थापनका लागि अभिमुखीकरण गरिएको हो ।
त्यस अवसरमा जिल्ला समन्वय समिति गुल्मीका प्रमुख द्रोणबहादुर खत्रीले किशोरीहरूको रक्तअल्पता परीक्षणका लागि समन्वय र अनुगमन गरी सहयोग पुर्याउने बताउनुभयो । अभिमुखीकरण कार्यक्रमको सहजीकरण परिवार नियोजन सुपरभाइजर गोपाल बहादुर कार्कीले गर्नुभएको हो । वरिष्ठ जनस्वास्थ्य अधिकृत पुष्पा थापाको अध्यक्षता रहेको थियो । प्रमुख जिल्ला अधिकारी कृष्ण प्रसाद शर्मा, जिल्लाका सुरक्षा निकायका प्रमुख एवम् प्रतिनिधिको समेत उपस्थिति रहेको थियो ।
