बासुदेव शर्मा
जाजरकोट पुुस २३ गते । राधामाधव समितिले भूकम्प पीडित विद्यार्थीलाई न्यानो कपडा वितरण गरेको छ । गत कात्तिक १७ गतेको भूकम्पले पीडित नलगाड नगरपालिकाका विभिन्न विद्यालयमा पढ्ने विद्यार्थीलाई न्यानो कपडा वितरण गरिएको हो ।
हिउमन च्यारिटी फाउण्डेशन नेपालको सहयोगमा राधामाधव समितिले नलगाड नगरपालिकाका विभिन्न वडास्थित भूकम्पको जोखिममा रहेका विद्यार्थीलाई न्यानो कपडा वितरण गरिएको छ ।
नलगाड नगरपालिका–३ चाउलेचौर नेपाल राष्ट्रिय प्राथमिक विद्यालयमा पठनपाठन गर्ने ६५ जना, वडा नम्बर ४ लहँस्थित भानुभक्त प्राथमिक विद्यालयमा अध्ययनरत १०७, मानचौर स्थित जनजागरण प्राथमिक विद्यालयका ३४, हिमालय प्राथमिक विद्यालयका ३५, रामभक्त प्राथमिक विद्यालयका ३३ जना विद्यार्थीलाई ऊनको न्यानो टोपी र स्विटर वितरण गरेको राधामाधव समितिका ओमप्रकाश राठौरले बताउनुभयो ।
गत मङ्सिर २४ गते नलगाड नगरपालिका पाली स्थित सिद्ध साईँकुमारी प्राथमिक विद्यालय, कल्पतको शिवशङ्कर आधारभूत विद्यालय र नेपाल राष्ट्रिय प्राथमिक विद्यालयमा ४५० जना विद्यार्थीलाई न्यानो स्विटर टोपी वितरण गरिएको राठौरले बताउनु भयो ।
भूकम्पका कारण जोखिममा रहेका व्यक्तिलाई उद्धार गर्नु त्यो भन्दा ठुलो पुण्यको काम अरू छैन भन्दै राधामाधव समितिले भूकम्प प्रभावित क्षेत्रमा स्वास्थ्य शिविर गरेको छ ।
