एनसेल प्रकरणबारे सरकारले प्रष्ट पार्नुपर्छ : अध्यक्ष ओली

गोरखापत्र अनलाइन

तेह्रथुम, मंसिर २८ गते । नेकपा (एमाले) का अध्यक्ष एवं पूर्व प्रधानमन्त्री केपी शर्मा ओलीले एनसेल शेयर खरिद बिक्री प्रकरणमा धेरैको संलग्नता रहेको बताउनुभएको छ । बिहीबार तेह्रथुममा महाकाली–मेची अभियानअन्तर्गत आयोजित सभालाई सम्बोधन गर्दै उहाँले यस्तो बताउनुभएको हो । 

उहाँले एनसेल बेच्ने तयारी भइरहेको भन्दै सरकारी व्यक्तिको संलग्नताबिना बेचिन नसक्ने आरोप लगाउनुभयो । खरबौँको कारोबार हुने कम्पनी केही अर्बमा मात्र बिक्री गर्दा आशङ्का उब्जिएको उहाँको भनाइ छ । देशलाई घाटा पारेर सरकारमा रहेकाहरूले जालझेल गरी अर्को कम्पनीलाई बिक्री गरेको उहाँले टिप्पणी गर्नुभयो । चार वर्षमा नेपाल सरकारकै स्वामित्वमा आउने कम्पनी कौडीको मूल्यमा जालझेल गरी बेच्न लागेको उहाँले चर्चा गर्नुभयो । नागरिकहरूले सरकारको संलग्नता रहेको आरोप लगाइरहँदा त्यसबारे सरकारले प्रष्ट पार्नुपर्ने उहाँको माग छ । 

उहाँले भन्नुभयो, ‘हामीले चुनावमा भोट दिएर जिताइ पठाएकाहरू सरकारमा जाँदा अहिले के गरिरहेका छन् भनेर जनताले प्रश्न गरिरहेका छन् । क्विन्टलका क्विन्टल सुन एयरपोर्टबाट भित्रिन्छ । कति किलो सुन सिग्रेट भनेर भित्रिन्छ । कति किलो दिनैपिच्छे सुन देशमा तस्करी भइरहन्छ । यो उचित होइन ।’ 

सरकारी व्यक्तिको संलग्नताविना यत्ति धेरै सुन आउन नसक्ने उहाँको भनाइ छ । अध्यक्ष ओलीले सरकार कतिबेला ढल्छ भन्ने टुंगो नभएको जिकिर गर्नुभयो । जनतालाई जवाफ दिन नसक्ने हो भने सरकार समस्यामा पर्ने उहाँले दावी गर्नुभयो ।