अर्जुन काफ्ले
स्याङ्जा, मङसिर १९ गते । अर्जुनचौपारी गाउँपालिकामा प्रथम राष्ट्रपति कप तथा शैक्षिक महोत्सव-२०८० मङ्गलबारबाट सुरु भएको छ । पालिका बनेको सातौँ वर्षमा गाउँपालिकाको खेल मैदानमा राष्ट्रपति कप तथा शैक्षिक महोत्सव सुरु भएको हो ।
मङ्सिर २२ गतेसम्म सञ्चालन हुने खेलकुद महोत्सवमा भलिबल, एथलेटिक्स, सटफुट, हाइजम्प, लङजम्प, त्रिपलजम्प भलिबल छात्र/छात्रा हुने छ भने चम्चारेस, म्युजिकल चियर, डोरी तान्ने, स्याक रेसलगायतका प्रतिस्पर्धा हुनेछ ।
प्रतियोगितामा पालिका अध्यक्ष प्रकाश तिवारीले खेलमा हारजित हुने बताउँदै सहभागिता नै ठुलो जित भएको बताउनुभयो । अर्जुनचौपारीलाई खेलकुदबाट चिनाउने सक्ने बताउँदै तिवारीले त्यसैले खेलकुद महोत्सव गरिएको बताउनुभयो ।
यस्तै उपाध्यक्ष सपना गुरुङले खेलकुद महोत्सवले प्रतिभा प्रपुष्ठन गर्न सहज हुने बताउनुभयो । साहित्य कला र सङ्गीत नभएको मानव पुच्छर नभएको पशुबराबर भएको हुने गुरुङको भनाइ थियो ।
यस्तै प्रमुख प्रशासकीय अधिकृत आशिष् शर्माले खेल र अध्ययनलाई सगँसगै अगाडि बढाउन आग्रह गर्नुभयो । कार्यक्रममा शिक्षक विष्णु चापागाईँ, ओम गुरुङ, विद्यार्थी सुस्मिता शर्मा पौडेल, अशोक ढकाललगायतले मन्तव्य राख्नुभएको थियो ।
राष्ट्रपति कप तथा शैक्षिक महोत्सवमा छ मावि सहित २८ विद्यालय ३२४ जना विद्यार्थी सहभागी रहेका छन् । व्यक्तिगततर्फ प्रथम र द्वितीय तथा समूहगत खेलमा एक टिमले राष्ट्रपति कपको जिल्लास्तरीय प्रतिस्पर्धामा सहभागिता जनाउनेछन् ।
