कालीकोट समाचारदाता
कालीकोट, कात्तिक १४ गते । सुन्दा अच्चम लाग्न सक्छ तर सत्य घटना हो, कालीकोटको कोटवाडामा भर्खरै सम्पन्न भएको सुनथराली एयरपोर्ट ३८ वर्ष लगाएर निर्माण सम्पन्न भएको छ ।
२०४२ सालमा तत्कालीन जिल्ला विकास समितिको बजेटबाट शिलान्यास भएको सुनथराली एयरपोर्ट झन्डै चार दशक लगाएर निर्माण सम्पन्न भए पनि यहाँ हवाईजहाज आउने अत्तोपत्तो छैन ।
औपचारिक विमानस्थल उद्घाटनको मिति चौथो पटक सरेको छ । नागरिक उड्डयन प्राधिकरणले वैशाख १३ गते पहिलो पटक समय निधारण गरेर सुनथराली एयरपोर्टमा हवाईजहाज आउने भनिएको थियो, त्यो दिन आएन । त्यसपछि असार १३ गतेको मिति तय भयो, त्यो मिति पनि ट¥यो । तेस्रो पटक साउन १३ गते मिति तय भयो ।
मन्त्री सुदन किरातीले त्यो मितिमा आफ्नो व्यक्तिगत कारण जनाउँदै आउन नपाइने भन्दै अर्को मिति उहाँ आफैँले तोक्नुभयो । त्यो मिति थियो भदौ १३ गतेको । पटक पटक मिति तोकिए पनि एयरपोर्टको औपचारिक उद्घाटन नभएकाले कालीकोटका नागरिकले प्लेन चढ्ने सपना मात्र भएको छ । नरहरिनाथ गाउँपालिका–१ को कोटवाडामा रहेको सुनथराली एयरपोर्टमा चार पटकसम्म पनि औपचारिक उद्घाटनको मिति सर्नुमा नेता अनुकूलको समय नमिलेको बताउने धेरै छन् ।
नरहरिनाथ–१, कोटवाडाका अग्र विष्टले अब यो सरकार र मन्त्रीले एयरपोर्टको औपचारिक उद्घाटन गर्लान् जस्तो आफूलाई नलागेको बताउनुभयो ।
