गोरखापत्र अनलाइन
काठमाडौं, भदौ २४ गते । नेकपा (एमाले) का उपमहासचिव प्रदीप ज्ञवालीले कोशी प्रदेश सरकार गठनका लागि काँग्रेससँग छलफल भइरहेको बताउनुभएको छ ।
आइतबार सिंहदरबारमा प्रधानमन्त्रीले आसन्न अमेरिका र चीन भ्रमणबारे छलफल गर्न बोलाउनुभएको बैठकमा उहाँले सो कुरा बताउनुभएको हो । उहाँले पहिलादेखि नै काँग्रेस र एमाले मिलेर कोशी प्रदेश सरकार निर्माण गर्नुपर्छ भनेको भए पनि ठुलो पार्टीलाई निषेध गरी संविधान मिच्ने काम सत्ता गठबन्धनबाटै भएको बताउनुभयो ।
प्रदेशप्रतिको वितृष्णा बढेर जाने र नयाँ चुनावमा जानुपर्ने स्थिति अहिले नै आउँदा देशको अर्थतन्त्रमा थप समस्या पर्ने भन्दै काँग्रेसले समाधानको बाटोमा जानुपर्ने उहाँको भनाइ छ । उहाँले प्रदेशको हित र संविधान रक्षामा काँग्रेसले जिम्मेवारीपूर्ण भूमिका खेल्नुपर्ने बताउनुभयो ।
उहाँले भन्नुभयो, ‘हामीले कोशी प्रदेश सरकार गठनका लागि काँग्रेससँग छलफल गरिरहेका छौँ । यसअघि संविधान मिच्ने काम भए, त्यसको परिणाम आज हामीले भोगिरहेका छौँ । अब पनि त्यही बाटोमा जाने हो भने या त प्रदेशप्रतिको वितृष्णा बढेर जान्छ, या त त्यसको समाधानका लागि नयाँ चुनावमा जानुपर्ने स्थिति हुन्छ ।’
उपमहासचिव ज्ञवालीले प्रधानमन्त्रीले आसन्न चीन भ्रमणको विषयलाई लिएर सुझाव माग्नुभएको र आफूले चीनसँग विश्वास बटुलेर आउन सुझाव दिएको जानकारी दिनुभयो । उहाँले नेपाल र चीन सम्बन्ध सन्तुलित छिमेक सम्बन्धको बाटोबाट अन्यत्र लागेको हो कि भन्ने शङ्का चिनियाँहरूले गरिरहेको भन्दै त्यसलाई प्रधानमन्त्रीले चिर्नुपर्ने बताउनुभयो ।
उहाँले भन्नुभयो, ‘प्रधानमन्त्रीले आसन्न चीन भ्रमणको विषयलाई लिएर सुझावहरू माग्नुभएको छ । पछिल्लो समय जुन विश्वासको सङ्कटजस्तो देखिएको छ, नेपाल र चीन सम्बन्धमा । नेपालमा भइरहेको चिनियाँ लगानीलाई निरुत्साहित गर्न खोजेको हो कि वा अरू कुनै सेक्युरिटी अम्ब्रेलातिर नेपाल जान खोजेको हो कि भन्नेखालको छ, त्यसलाई चिर्ने काम र नेपाल असंलग्न परराष्ट्र नीतिको पक्षमा छ भन्ने पक्षमा सन्देश दिन सक्नुपर्छ ।’
उहाँले उच्चस्तरीय भ्रमणको क्रममा यसअघि भएका सम्झौता कार्यान्वयनमा जोड दिन आग्रह गरेको पनि बताउनुभयो ।
-square-thumb.jpg)
