प्रेमराज सिम्खडा
कालीकोट, भदौ २१ गते । कालीकोटको पचालझरना गाउँपालिका –९ ले टोलफ्रि नम्बर प्रयोगमा ल्याएको छ । वडा कार्यालयले नागरिकलाई सेवा लिन सहज होस् र कुनै सानो कामका लागि कार्यालयमै पुग्नुपर्ने अवस्थाको अन्त्यका लागि टोलफ्रि नम्बर प्रयोगमा ल्याएको हो ।
वडाका नागरिकलाई लक्षित गरी वडा कार्यालयले नागरिकलाई सेवा पनि होस् र फोन गर्दा सेवाग्राहीको रुपियाँ खर्च पनि नहोस् भनेर टोलफ्रि नम्बर प्रयोगमा ल्याएको जनाएको छ । वडा कार्यालयले १८१०५००००२५ को टोलफ्रि नम्बर प्रयोगमा ल्याएको छ ।
गाउँपालिकाले गर्न नसकेको काम वडा कार्यालयले गरेपछि नागरिक पनि उत्साहित भएका छन् । भदौ २० गतेबाट टोलफ्रि नम्बर प्रयोगमा आएको वडा कार्यालयले जारी गरेको सूचनामा उल्लेख छ । वडा ९ का वडा अध्यक्ष ललितजङ्ग शाहीले सेवाग्राहीका लागि निःशुल्क नम्बर प्रयोगमा ल्याएको बताउनुभयो ।
उहाँले यो सेवा बिहान दश बजेदेखि साँझ पाँच बजेसम्म सञ्चालन हुनेभएकाले फोन गरेर जानकारी लिन वडाका नागरिकलाई आग्रह गर्नुभयो । वडा कार्यालयले टोलफ्रि नम्बर प्रयोगमा ल्याएपछि जिल्ला बाहिर हुनेहरूलाई सहज हुनेभएको छ ।
