गोरखापत्र अनलाइन
काठमाडौं, भदौ १८ गते । प्रमुख प्रतिपक्षी दल नेकपा (एमाले) का सचेतक महेश बर्तौलाले कोरोनाकालका बीमितहरुको रकम तत्काल उपलब्ध गराउन सरकारलाई रुलिङ गर्न सभामुख देवराज घिमिरेको ध्यानाकर्षण गराउनुभएको छ ।
सरकारले सो बीमावापतको करिब ११ अर्ब रकम उपलब्ध गराउन चासो नदिएको चर्चा गर्नुहुँदै सचेतक बर्तौलाले सो सम्बन्धमा सरकारलाई रुलिङ गर्न सभामुख घिमिरेसँग माग गर्नुभएको हो ।
सोमबार प्रतिनिधि सभा बैठकको शुन्य समयमा धारणा राख्दै सचेतक बर्ताैलाले सरकारले नागरिकको सरोकारको विषयमा बेवास्ता गरिरहेको आरोप समेत लगाउनुभयो ।
उहाँले भन्नुभयो, ‘विगत ४ वर्षदेखि देशका एक लाख ५० हजारभन्दा बढी नागरिकले कोरोनाको बीमा गरेका थिए । त्यसबापतको रकम अहिलेसम्म भुक्तानी पाएका छैनन् । ११ अर्व रकम सरकारले तिर्न बाँकी छ । सरकारलाई त्यसको किन चासो भएन ? सभामुख महोदय विशेष रुलिङ होस् ।’
सचेतक बर्तौलाले मकवानपुरस्थित इन्द्रसरोबर तालको तत्काल सफाइको व्यवस्था मिलाउन पनि सरकारसँग आग्रह गर्नुभयो ।
