अफ्रिका, भदौ ५ गते । अफ्रिकाको दक्षिण पूर्वको मध्यमा रहेको भूपरिवेष्ठित राष्ट्र जिम्बाबेमा अगस्ट २३ अर्थात् भोलि (बुधबार) आम निर्वाचन हुँदैछ । यो निर्वाचनले राष्ट्रपतिको चयन गर्नेछ ।
सन् १९८० मा स्वतन्त्र भएको जिम्बाबेमा ‘जिम्बाबे अफ्रिकी राष्ट्रिय सङ्घ राष्ट्रवादी’ पार्टीले निरन्तर शासन गर्दै आएको छ । यो आम निर्वाचनपछि पनि जिम्बाबे अफ्रिकी राष्ट्रिय सङ्घ राष्ट्रवादी शासनमा निरन्तर हुन चाहन्छ ।
राष्ट्रपति पदका लागि ११ जना उम्मेदवार प्रतिस्पर्धा गर्नेछन् । यो आम निर्वाचनमा मुख्य प्रतिस्पर्धा जिम्बाबे अफ्रिकी राष्ट्रिय सङ्घ राष्ट्रवादीका नेता तथा वर्तमान राष्ट्रपति इमर्सन मनङ्गाग्वा र परिवर्तनका लागि नागरिक गठबन्धनको नेतृत्व गरिरहेका नेल्सन चामिसाबीच हुने बताइएको छ ।
मनङ्गाग्वाले शनिबार आफ्नो गृह प्रान्त मिडल्याण्ड्समा आफ्नो चुनावी अभियानको समापन गर्नुभयो भने चामिसाले सोमबार जिम्बाबेको राजधानी हरारेमा आफ्नो चुनावी अभियान समापन गर्नुभयो । जिम्बावे निर्वाचन आयोगको तथ्याङ्क अनुसार, ६० लाखभन्दा बढी मानिसले मतदान गर्नेछन् ।
जिम्बाबेमा हरेक पाँच/पाँच वर्षमा आवधिक निर्वाचन हुन्छ । पछिल्लो चुनाव २०१८ मा भएको थियो । जिम्बाबेमा राष्ट्रपतिको चुनावमा भाग लिनका लागि उमेर कम्तीमा ४० वर्ष हुनुपर्ने व्यवस्था छ ।
जिम्बावेको संविधानले संसद्का ३५० सदस्यको निर्वाचनको व्यवस्था गरेको छ । संसदमा राष्ट्रिय सभा र सिनेटमा क्रमशः २७० र ८० सांसद हुन्छन् ।
