काठमाडौं, साउन ३ गते । आयोजक मनास्लु वर्ल्ड कलेजले तेस्रो मनास्लु एसइई कप थ्री बाइ थ्री बास्केटबल प्रतियोगिताको उपाधि बुधबार जितेको छ ।
चुच्चेपाटीस्थित घरेलु कोर्टमा भएको फाइनलमा मनास्लुले युजेएलाई २१–१४ ले हरायो । मनास्लुका लागि पेम्बा बमजनले सर्वाधिक ११ स्कोर गर्नुभयो ।
मनास्लुकै तुसार महर्जनले ६ तथा कोसिस भुजेलले चार अङ्क जोड्नुभयो । सेमिफाइनलमा मनास्लुले आईएसए नेपाल तथा युजेएले आदिम कलेजलाई हराउँदै उपाधि भिडन्त पक्का गरेका थिए ।
उपाधिसँगै मनास्लुले १५ हजार रुपियाँ पुरस्कार पायो । युजेएले सात हजार रुपियाँ पुरस्कार पायो । विजेता र उपविजेता टोलीका सदस्यले नगद पुरस्कारसहित छात्रवृत्ति पनि पाउने छन् । मनास्लुका तुसार महर्जन ‘मोस्ट भेलुएबल प्लेयर’ घोषित हुनुभयो । तुसारले पनि छात्रवृत्ति प्रदान गरिने छ ।
विजेतालाई मनास्लुका अध्यक्ष गेन्द्र लामा र प्रिन्सिपल राजन श्रेष्ठले एक कार्यक्रमबीच पुरस्कृत गर्नुभयो । एक दिने लिग कम नकआउट प्रतियोगितामा १६ छात्र टिमले प्रतिस्पर्धा गरेको प्रतियोगिता संयोजक सुनिल योञ्जनले जनाएका छन् ।
