नागरिकता बनाउनेभन्दा राहदानी बनाउने धेरै

मीना कंडेल

कावासोती ,साउन ३ गते । पूर्वी नवलपरासीबाट वैदेशिक रोजगारमा जानेको सङ्ख्या दिनप्रतिदिन बढ्दै गएको छ । जिल्ला प्रशासन कार्यालय नवलपुरका अनुसार यहाँ नागरिकताभन्दा राहदानी बनाउनेको भिड छ । गत आवमा नागरिकताको तुलनामा राहदानी लिनेको सङ्ख्या झन्डै दोब्बर छ ।

नवलपुरमा चालु आर्थिक वर्षको हालसम्म २४ हजार १ सय १४ जनाले राहदानी (पासपोर्ट) बनाएका छन् । नवलपुरबाट यस आर्थिक वर्षमा पाँच सय ८२ महिला सहित २३ हजार ५ सय ३२ जना वैदेशिक रोजगारका लागि राहदानी बनाएका छन् । यस्तै आ.वमा १८ हजार ३ सय ६० जनाले नेपाली नागरिकता र १३ हजार ९ सय २८ जनाले नागरिकताको प्रतिलिपि लिएको प्रमुख जिल्ला अधिकारी कल्पना श्रेष्ठले बताउनुभयो ।

छोराछोरी विदेश भएकाको आमा छोराछोरी भेट्न जाने, उच्च शिक्षा अध्ययन गर्न जाने युवतीहरू, श्रीमान् विदेशमा हुनेको श्रीमती श्रीमान् भेटघाटका लागि जानका लागि पनि राहदानी बनाउन आउने गरेको कारण पनि राहदानी लिन आउनेको सङ्ख्यामा वृद्धि हुने गरेको सहायक प्रमुख जिल्ला अधिकारी सुवास लामिछानेले बताउनुभयो  ।

जिल्लाको कावासोती, गैँडाकोट, मध्येविन्दु र विनयी त्रिवेणी पालिकासँगको सहकार्यमा हिमालयन सामुदायिक विकास मञ्च (हिकोडेफ)ले सुरक्षित आप्रवासन (सामी) मार्फत कार्यक्रम सञ्चालन गरिरहेको छ । जिल्लाबाट पासपोर्ट बनाउनेलाई अनिवार्य रूपमा सूचना प्रदान गर्ने गरिएको छ । 

जिल्लामा सञ्चालित कार्यक्रम मार्फत सूचनामा पहुँच, न्यायमा पहुँच, सीप विकास तालिम, मनोसामाजिक परामर्श र वित्तीय साक्षरताका क्षेत्रमा रहेका काम गर्ने गरिएको परामर्शकर्ता रञ्जना लम्सालले बताउनुभयो ।

राहदानी लिनेको सङ्ख्या बढेसँगै राजस्व सङ्कलनमा पनि वृद्धि आएको छ । राहदानी दस्तुरबाट वार्षिक करोडौँ रुपियाँ राजस्व सङ्कलन हुने गरेको छ । जिल्ला प्रशासन कार्यालय नवलपुरले एक वर्षमा राहदानी वितरण बाट १० करोड बढी राजस्व सङ्कलन गरेको छ । 

त्यसैगरी, संस्था दर्ता नवीकरणबाट ११ लाख ४१ हजार ७ सय, दण्ड जरिवानाबाट २८ लाख ४४ हजार ६ सय ७, सरकारी सम्पत्ति विक्रीबाट ४ लाख र परीक्षा शुल्कबाट ७ हजार गरेर एक वर्षमा कुल ११ करोड ५७ लाख ११ हजार ४ सय ७७ राजस्व सङ्कलन गरेको छ ।