छुट्टाछुट्टै दुर्घटनामा तीन जना घाइते

राममणि दाहाल

हेटौँडा, असार २७ गते । मकवानपुरमा भएको छुट्टाछुट्टै दुर्घटनामा तीन जना घाइते भएका छन् । पूर्व– पश्चिम राजमार्ग अन्तर्गत मनहरी गाउँपालिका –९ चौधमाईस्थित सडक खण्डमा बुधबार हेटौँडाबाट मनहरीतर्फ जाँदै गरेको ना.१ ज ७७०१ नम्बरको म्याजिक गाडीले सोही दिशाबाट जाँदै गरेको ना २८ प १०९७ नम्बरको मोटरसाइकललाई ठक्कर दिँदा दुई जना घाइते भएको जिल्ला प्रहरी कार्यालय मकवानपुरले जनाएको छ । 

प्रहरीकाअनुसार मोटरसाइकल चालक चितवनको राप्ती नगरपालिका –२ स्थित गडौलीका वर्ष ५५ का छुमबहादुर उप्रेतीको दाहिने हात र खुट्टामा चोट लागेका छ । यस्तै, मोटरसाइकल पछाडि सवार सोही स्थानका वर्ष ४५ कि अम्बिका उप्रेतीको दाहिने हात र खुट्टामा चोट लागेको छ ।

दुवै जनालाई उपचारका लागि भरतपुर पठाइएको छ । दुवै सवारी साधन र म्याजिक चालकलाई नियन्त्रणमा लिइएको छ । यसैगरी पूर्व–पश्चिम राजमार्ग अन्तर्गत मनहरी गाउँपालिका –८ सिमपानीस्थित सडक खण्डमा हेटौँडाबाट मनहरीतर्फ जाँदैगरेको बा.प्र. ०३–००१ ह ४७१ नम्बरको अटोले सोही दिशाबाट जाँदैगरेको बा ६९ प ७०४५ नम्बरको स्कुटीलाई ठक्कर दिँदा स्कुटीचालक सोही स्थान बस्ने वर्ष ३२ को लीलाधर स्याङ्तान घाइते हुनेभएको छ । 

घाइते स्याङ्तानलाई उपचारका लागि भरतपुर पठाइएको प्रहरीले जनाएको छ । प्रहरीले दुवै सवारी साधनसहित अटोचालकलाई नियन्त्रणमा लिएको छ ।