शुक्रबार गण्डकी प्रदेशमा सार्वजानिक बिदा

अमरराज नहर्की
तनहुँ, असार २७ गते । राष्ट्रिय विभूति आदिकवि भानुभक्त आचार्यको जन्मजयन्तीको अवसरमा गण्डकी प्रदेश सरकारले सार्वजनिक बिदा दिने निर्णय गरेको छ । नेपाली भाषाका धरोहर आचार्यको जन्मजयन्तीको अवसरमा सरकारले असार २९ गते शुक्रबार सार्वजनिक बिदा दिने निर्णय गरेको हो ।

प्रदेश सरकार मन्त्रिपरिषदको २०७९ चैत ८ गतेको निर्णयअनुसार बिदा दिने निर्णय गरेकाले बिदा दिइएको मुख्यमन्त्री कार्यालयद्वारा प्रकाशित सूचनामा उल्लेख गरिएको छ ।

उपसचिव सुरणप्रसाद शर्मा पौडेलद्वारा हस्ताक्षरित सूचनामा गण्डकी प्रदेशका सबै सरकारी निकाय, शैक्षिक संस्था र सार्वजनिक संस्थामा सार्वजनिक बिदा रहेको जनाइएको छ । पृथ्वीनारायण शाहले भौगोलिक रूपमा एकीकरण गरेको नेपाललाई आदिकवि भानुभक्तले भाषा, साहित्य र संस्कृतिलाई विस्तार गरी नेपालीलाई एकतामा बाँध्नुभएको थियो  ।

वि.सं. १८७१ असार २९ गते तनहुँको चुँदी रम्घामा पिता धनञ्जय र माता धर्मावतीदेवीका पुत्रका रुपमा भानुभक्त जन्मिनुभएको थियो  । उहाँले ‘अध्यात्म रामायण’को भावानुवाद गरी नेपाली समाजमा मौलिक नेपाली भाषा, साहित्य, धर्म, दर्शन र राष्ट्रियताको बीजारोपण गर्नुभएको थियो ।

भानुभक्तले लेखेको रामायण अहिले पनि नेपालीहरूको घरघरमा स्वर, लयका साथ पाठ गर्ने गरिन्छ । भानुभक्तका ‘प्रश्नोत्तर’ (१९१०), ‘भक्तमाला’ (१९१०) ‘वधूशिक्षा’ (१९१९), ‘रामगीता’ (१९२५) तथा दर्जनौं साहित्यिक कृति प्रकाशित छन् । जातीय एकता, राष्ट्रिय पहिचान र नेपाली सांस्कृतिक चेतना जगाउन र राष्ट्रिय संस्कृतिलाई बलियो बनाउनमा भानुभक्तको ऐतिहासिक योगदान छ । भानुभक्तको विसं १९२५ असोज ६ गते चुँदीरम्घामै निधन भएको थियो । उहाँका पाण्डुलिपिलाई सङ्ग्रह गरेर मोतीराम भट्टले पुस्तकाकारमा प्रकाशित गरेपछि उहाँ नेपाली साहित्यमा चिनिनुभएको थियो ।

चुँदीरम्घामा आजदेखि भानुजयन्ती मनाउन सुरु
यसैबीच तनहुँको भानु नगरपालिका–४ चुँदीरम्घामा जन्मिनुभएका आदिकवि भानुभक्त आचार्यको २१० औं जन्मजयन्ती चुँदीरम्घामा बुधबारबाट मनाउन थालिएको छ । आदिकवि भानुभक्त जन्मस्थल विकास समितिको आयोजना मनाउन थालिएको हो । स्वदेश तथा विदेशी साहित्यकारहरुको समेत जमघट गरेर भानुजयन्ती तीन दिनसम्म मनाउन थालिएको हो ।

दिवसको अवसरमा बुधबार स्थानीय मठमन्दिरमा पूजाअर्चना गरिएको छ भने र साँझ दीपावली गरिँदै छ । बिहीबार २८ गते भानुभक्तीय रामायण वाचन प्रतियोगिता, राष्ट्रिय स्तरको खुला कविता प्रतियोगिता र असार २९ गते शुक्रबार प्रभातफेरि, भानुभक्तको शालिकमा माल्यार्पण, श्रद्धाञ्जली सभा, साहित्य तथा सांस्कृतिक कार्यक्रम गरिने आदिकवि भानुभक्त जन्मस्थल विकास समितिका कार्यकारी निर्देशक शङ्कर रानाभाटले जानकारी दिनुभयो ।

खुला कविता प्रतियोगितामा प्रथम, द्वितीय र तृतीय  हुनेलाई क्रमशः १० हजार, सात हजार र पाँच हजार पुरस्कार प्रदान गरिनेछ । यस्तै, रामायण वाचनतर्फ प्रथम, द्वितीय र तृतीय हुनेलाई क्रमशः पाँच हजार, तीन हजार र एक हजार पुरस्कार प्रदान गरिने आयोजकले जनाएको छ । 

असार २९ गतेको कार्यक्रम गण्डकी प्रदेशका मुख्यमन्त्री सुरेन्द्र पाण्डेको प्रमुख आतिथ्यमा हुने समितिले जनाएको छ । उक्त कार्यक्रममा साहित्यिक क्षेत्रका विभिन्न व्यक्तिलाई सम्मान गरिनेछ । भानुभक्तको जन्मजयन्ती भारतको दार्जिलिङ, सिक्किम, भुटान, बर्मालगायत नेपाली भाषाभाषी रहेका देश एवम् स्थानमा मनाउने गरिन्छ ।