‘लभ, साइमन’ प्रदर्शन

काठमाडौँ, असार १२ गते  । नेपालस्थित अमेरिकी दूतावासद्वारा आयोजित समर मुभी सिरिजमा रोमान्टिक कमेडी चलचित्र ‘लभ, साइमन’ प्रदर्शन गरिएको छ । ललितपुरको लबिमस्थित क्युएफएक्स सिनेमा हलमा बिहीबार ग्रेग बर्लान्टीद्वारा निर्देशित चलचित्र प्रदर्शन भएको हो ।

सन् २०१८ मा रिलिज भएको यो चलचित्रमा हाइस्कुल अध्ययनरत समलिङ्गी किशोरको कथा रहेको छ । बेकी अल्बर्टालीको उपन्यास ‘साइमन भर्सेस् होमो सेपियन्स एजेन्डा’ मा आधारित यस चलचित्रमा निक रोबिन्सन, जोश दुहामेल र जेनिफर गार्नरको प्रमुख अभिनय रहेको छ । शिक्षक, परिवार र साथीभाइसँग आफ्नो लैङ्गिक पहिचानलाई लुकाइरहेको किशोरले प्रेम प्राप्त गर्न गर्नु परेको सङ्घर्षलाई यस चलचित्रमा रोचक ढङ्गले प्रस्तुत गरिएको छ ।

समलिङ्गी समुदायले ‘प्राइड मन्थ’ का रूपमा मनाउने गरेको जुन महिनालाई लक्षित गरी सम्बन्धित कथावस्तुमा आधारित चलचित्र प्रदर्शन गरिएको हो । प्रदर्शनीमा लैङ्गिक अल्पसङ्ख्यक समुदायको उल्लेख्य उपस्थिति थियो ।