राष्ट्रपति पौडेलको मुटुमा पेसमेकर राखियो

काठमाडौं, असार ५ गते। राष्ट्रपति रामचन्द्र पौडेलको छातीमा पेसमेकर राखिएको छ।

त्रिवि चिकित्सा शास्त्र अध्ययन संस्थान मनमोहन कार्डियोथेरासिक भास्कुलर एन्ड ट्रान्सप्लान्ट सेन्टरमा राष्ट्रपति पौडेलको छातीको शल्यक्रिया गरेर पेसमेकर राखिएको सेन्टरका कार्यकारी निर्देशक प्रा.डा. रत्नमणि गजुरेलले विज्ञप्तिमार्फत् जानकारी दिनुभयो । 

राष्ट्रपति पौडेलको मुटुको धड्कन अस्थिर भएपछि गत शनिबार राति उहाँलाई अस्पतालमा भर्ना गरिएको थियो। चिकित्सकका अनुसार पेसमेकर मुटुमाथि राखिने सानो यन्त्र हो। यसले मुटुको चाललाई स्थिर बनाउन सहयोग गर्छ। हाल उहाँको स्वास्थ्य अवस्था सामान्य रहेको विज्ञप्तिमा उल्लेख छ ।

यो भन्दा पहिले राष्ट्रपति पौडेल जेठ ३० गते सामान्य स्वास्थ्य परीक्षणका लागि शहीद गङ्गालाल राष्ट्रिय हृदय केन्द्र भर्ना हुनुभएको थियो। 

अस्पतालमा एक दिन चिकित्सकको निगरानीमा राखेर राष्ट्रपति पौडेललाई जेठ ३१ गते डिस्चार्ज गरिएको थियो। राष्ट्रपति पौडेलको छाती र पेटमा समस्या देखिएपछि  चैत १८ गते त्रिवि शिक्षण अस्पताल, महाराजगञ्जमा भर्ना गरिएको थियो । त्यसको चार दिनपछि चैत २२ गते उहाँ डिस्चार्ज हुनुभएको थियो।

वैशाख ५ गते राष्ट्रपति रामचन्द्र पौडेलको फोक्सोमा समस्या आएपछि शिक्षण अस्पतालमा पुनः भर्ना गरिएको थियो। सोही समयमा छातीमा सङ्क्रमण देखिएपछि चिकित्सकको सल्लाह अनुसार वैशाख ६ गते उहाँलाई थप उपचारका लागि भारत लगिएको थियो। भारतको दिल्लीस्थित अल इण्डिया इन्स्टिच्युट अफ मेडिकल साइन्सेस (एम्स)मा लामो उपचारपछि उहाँ वैशाख १७ गते डिस्चार्ज हुनुभएको थियो।